Tags-Ishq

ishq meñ maut se miltī hai hayāt-e-abadī
ishq kī maut to anjām bhī āġhāz bhī hai

us ne nazreñ uThā ke dekh liyā
ishq kī jur.at-e-nigāh ga.ī

tanhā chaleñ haiñ ma.arka-e-ishq jhelne
un kī taraf ḳhudā.ī hai koī idhar nahīñ

ḳhālī safā.ī-qalb se behtar hai dāġh-e-ishq
kyā aib hai ki jis ke muqābil hunar nahīñ

maidān-e-vafā darbār nahīñ yaañ nām-o-nasab kī pūchh kahāñ
āshiq to kisī kā naam nahīñ kuchh ishq kisī kī zaat nahīñ

gar baazī ishq kī baazī hai jo chāho lagā do Dar kaisā
gar jiit ga.e to kyā kahnā haare bhī to baazī maat nahīñ

is bahāne ke ba.ad kaisā ishq
bhuul jaane ke ba.ad kaisā ishq

ya.anī tum mujh ko āzmāoge
āzmāne ke ba.ad kaisā ishq

zabt to asl hai mohabbat kī
ġham jatāne ke ba.ad kaisā ishq

ye tirā vahm hai faqat ik vahm
tere jaane ke ba.ad kaisā ishq

ik kamī kā kasak kā naam hai ye
ishq paane ke ba.ad kaisā ishq

kam na thā ishq azal se rusvā
kar diyā aur bhī rusvā ham ne

havā-e-ishq ne bhī gul khilā.e haiñ kyā kyā
jo merā haal thā vo terā haal hone lagā

is ishq meñ kyā khoyā is dard se kyā paayā
tum ne nahīñ pūchhā bhī ham ne nahīñ sochā bhī

jīteñge na ham se bāzi-e-ishq
aġhyār ke piT paḌeñge pāñse

havas meñ kuchh bhī kar sakte ho
ishq meñ pābandī rakkhī hai

mujh se kis ne ishq kiyā hai kaun mirā mahbūb huā
mere sab afsāne jhūTe saare sher ḳhayālī haiñ

gar imtihān-e-ishq ho manzūr to abhī
kartā huuñ maiñ niyāz dil o jaan lījiye

raat bhar jaagā kiye palkeñ na jhapkīñ ham ne
raat bhar ishq ke āzār ne sone na diyā

kabhī na ho sakī iz.hār-e-ishq kī jur.at
ye aur baat ka.ī sūratoñ ne man ko chhuā