Tags-Ishq

ishq karne meñ dil bhī kyā hai shoḳh
saikaḌoñ meñ se ik chunā hai shoḳh

ai nāz-e-ishq dār-o-rasan kī bisāt kyā
mere vufūr-e-shauq-e-shahādat ke sāmne

roz malte haiñ muñh par apne bhabhūt
ishq meñ ham ne le liyā bairāg

vaj.h-e-āvārgī-e-ishq-e-fasurda ma.alūm
nigah-nāz ko parda sā banā rakkhā hai

dard daulat hī sahī pahlū-e-rāhat hī sahī
kuchh dinoñ ishq ne bhī ḳhud ko bachā rakkhā hai

haa.e re majbūriyāñ mahrūmiyāñ nākāmiyāñ
ishq āḳhir ishq hai tum kyā karo ham kyā kareñ

apne siine ke minā meñ bhī tah-e-ḳhanjar-e-ishq
jab koī fidya badaltā hai ġhazal hotī hai

ishq-e-dil meñ tuġhyānī barf barf hoñToñ par
sar-phirī bhī hai chāhat aur be-zabāñ bhī hai

raas aa.e jise us ko āsān hai ishq kī varna har mauj tūfān hai
ai 'sabā' ek dariyā hai ye aag kā vo bhī aisā ki jis kā kinārā nahīñ

fasāna ban ke apnā ishq duniyā kī zabāñ par hai

tamāshā ho jo dil meñ aks-e-rū-e-yār ho paidā
ki apnā ishq kā ik mahram-e-asrār ho paidā

kahīñ muñh phertā hai jāñ-nisār-e-ishq marne se
fidā vo jaan kar le tujh pe gar sau baar ho paidā

har ishq ke manzar meñ thā ik hijr kā manzar
ik vasl kā manzar kisī manzar meñ nahīñ thā

dekhnā chheḌūñgā maqtal meñ bhī sāz-e-sarmadī
ishq par jab zulm hogā naġhma-ḳhvāñ ho jā.ūñgā

phir us ke ba.ad mirā sar rahā na shānoñ par
dayār-e-ishq meñ vo sañg-e-dar milā thā mujhe

har dam ye do adū haiñ pa.e-jān-e-nā-tavāñ
ik dard-e-ishq hai ġham-e-hijrāñ hai dūsrā

rah-rav-e-ishq haiñ manzil kī hameñ kyā ummīd
kyā chale ḳhaak agar baiTh ke do-gām chale

sadā.eñ dasht detā hai mujhe vahshat bulātī hai
so ḳhāk-e-ishq apne sar pe malnā chāhtā huuñ maiñ

ishq jab manzil-e-āḳhir se guzartā hogā
ek bhī ashk na āñkhoñ se Tapaktā hogā

niyāz-e-ishq ko sūrat na jab koī nazar aa.ī
junūn-e-bandagī meñ ḳhud ko sajda kar liyā maiñ ne