Tags-Ishq

baaz aa 'bīmār' us ke ishq se jaane bhī de
taras aatā hai ye terī naujavānī dekh kar

ishq-bāzī ko kyā karegā tū
go ki chhoḌā maiñ ik sharāb o qimār

tum mire ishq kī taqdīr banogī is baar
jiit jā.egā mirā josh-e-junūñ sochā thā

ishq us kā aan kar yak-bārgī sab le gayā
jaan se ārām sar se hosh aur chashmoñ se ḳhvāb

ishq ke hāthoñ se juuñ farhād-o-qais
kyā kahīñ kis kis ke ghar ghāle paḌe

us bevafā ne ham ko agar apne ishq meñ
rusvā kiyā ḳharāb kiyā phir kisī ko kyā

tū ne is ishq meñ paa.ī hai bahut sī daulat
mujh sā nādār to le-de ke qalamkār huā

kāfir-e-ishq huā jab se maiñ is dahr meñ huuñ
hai mire kufr se ye diin aur īmāñ nāzāñ

mahv-e-ishq-e-shah-e-ḳhādim huuñ maiñ 'āsim' yaksar
husn par jis ke haiñ ye mere dil-o-jāñ nāzāñ

haath kyuuñ ishq-e-butāñ se na uThāyā tū ne
kaf-e-afsos ham ab malte haiñ har baar ki tū

ham to kahte the ki lab se na lagā sāġhar-e-ishq
mai-e-andoh se ab ham hue sarshār ki tū

vahshat-e-ishq burī hotī hai dekhā nādāñ
ham chale dasht ko ab chhoḌ ke ghar-bār ki tū

ātish-e-ishq ko siine meñ abas bhaḌkāyā
ab bhalā khīñchūñ huuñ maiñ āh-e-sharar-bār ki tū

ham ne ishq gunāh se bartar jaanā thā
aur dil par pahlā patthar afsos kā hai

duniyā kā zarra zarra miyāñ ishq ishq hai
adnā ho yā ho aalā yahāñ ishq ishq hai

jis roz ham ne ḳhvāb meñ dekhā thā aap ko
us roz se hamārā makāñ ishq ishq hai

duniyā isī liye to samajh hī nahīñ sakī
yaaro hamāre dil kī zabāñ ishq ishq hai

aañsū jo terī yaad meñ Tapkā thā ek shab
ruḳhsār par jo hai ye nishāñ ishq ishq hai

'salmān' kaise likkhegā us ke jamāl ko
inkār se bhī jis ke ayaañ ishq ishq hai

mire dam pe ishq meñ hai banī tujhe va.az-o-pand kī hai paḌī
mire nāsehā tujhe bandagī tirī dostī ko salām hai