Tags-Ishq

ishq hai pyāre khel nahīñ hai
ishq hai kāre-shīsha-o-āhan

umreñ bītīñ sadiyāñ guzrīñ
hai vahī ab tak ishq kā bachpan

hastī-e-shā.er allāh allāh
husn kī manzil ishq kā maskan

honā hai dard-e-ishq se gar lazzat-āshnā
dil ko ḳharāb-e-talḳhī-e-hijrāñ to kījiye

maiñ vo nahīñ rahā vo mirā dil nahīñ rahā
ab maiñ kisī se ishq ke qābil nahīñ rahā

dāḌhī baḌhā.ī ban gayā shā.ir se maulvī
'hāshim' ab un se ishq ke qābil nahīñ rahā

hamārī maut ne kuchh muḳhtasar kiyā varna
kuchh intihā hī na thī ishq ke fasāne kī

ahl-e-dil ne ishq meñ chāhā thā jaisā ho gayā
aur phir kuchh shaan se aisī ki sochā ho gayā

ishq miTTī kā ajab thā mujh ko bachpan meñ 'salīm'
khel meñ kyā sochtā maiñ jism mailā ho gayā

jeb-e-niyāz-e-ishq nishāñ-dār-e-nāz hai
ā.īna huuñ shikastan-e-tarf-e-kulāh kā

mujh ko yaad aayā bahut vo nā-murād-e-ishq 'mīr'
dil ke tāroñ par 'zafar' mutrib ne jab gaa.ī ġhazal

tire baġhair koī aur ishq ho kaise
ki mushrikoñ ke liye bhī ḳhudā zarūrī hai

mirī bad-zanī pe ye ranjisheñ to kisī bhī taur bajā nahīñ
ki jahān-e-ishq meñ bad-zanī to huzūr jurm-o-ḳhatā nahīñ

mire ishq ko tirī be-ruḳhī hī nasīb hai to yahī sahī
tirī be-ruḳhī rahe shādmāñ mujhe be-ruḳhī kā gilā nahīñ

huzūr-e-ishq batāo mujhe kahāñ jā.ūñ
tumheñ ḳhabar hai maiñ naav jalā ke aa.ī huuñ

husn-o-ishq judā hote haiñ jaane kyā tūfān uThegā
husn kī āñkheñ bhī haiñ pur-nam ishq kī āñkheñ bhī haiñ pur-nam

kuchh bhī ho par in āñkhoñ ne akasr ye aalam bhī dekhā
ishq kī duniyā nāz-e-sarāpā husn kī duniyā ijz-e-mujassam

ātish-e-ishq tire soḳhtagāñ juuñ sho.ala
jab talak haiñ koī ārām liye baiTheñge

hai koī mahv-e-namāz aur ḳhum-kade meñ koī mast
dil mirā ishq-e-butān-e-dil-shikan meñ mast hai

ai chārāgar vo dekh tire dar se nā-murād
bīmār-e-ishq yaas ke maare chale ga.e