Tags-Ishq

chhupe to kaise chhupe chaman meñ mirā tirā rabt-e-vālihāna
kalī kalī husn kī kahānī nazar nazar ishq kā fasāna

vahī rañj hai to yuuñ hī sahī vo 'qalaq' hī thā ki yuuñ hī nibhī
mirī aap ko bhī hai bandagī mirā ishq ko bhī salām hai

ishq karnā hai to din-rāt use sochnā hai
aur kuchh zehn meñ aayā to ḳhasāra hogā

ishq āvāra-mizāj
vo musāfir to gayā

bāġh-e-jahāñ ke saada jamāloñ se ishq hai
sabze se gul se sarv se lāloñ se ishq hai

haañ ḳhār-o-ḳhas se dil ko ilāqa hai paas kā
haañ is chaman ke taaza nihāloñ se ishq hai

saada sī guftugū ke ḳham-o-pech haiñ aziiz
ḳhāmoshiyoñ ke garm maqāloñ se ishq hai

jo bā-hunar haiñ un ke qadam chūmte haiñ ham
jo be-hunar haiñ un ke kamāloñ se ishq hai

būḌhoñ ke paara paara azā.em kā hai malāl
bachchoñ ke taaza taaza savāloñ se ishq hai

har be-navā faqīr ko dete haiñ ḳhūn-e-dil
har ḳhush-navā faqīr ke nāloñ se ishq hai

sāre-jahāñ ke talḳh-navāoñ se hai niyāz
sāre-jahāñ kī shīrīñ-maqāloñ se ishq hai

yā kufr-o-dīñ ke jānñe vāloñ se kyā ġharaz
yaañ kufr-o-dīñ ke mānñe vāloñ se ishq hai

bīmār-e-ishq huuñ lab-o-dandān-e-yār kā
nusḳhe meñ mere chāhiye sharbat anaar kā

āsār-e-ishq-e-ḳhāk se bhī apne haiñ ayaañ
be-vaj.h rañg zard nahīñ hai ġhubār kā

ishq mujh ko nahīñ vahshat hī sahī
merī vahshat tirī shohrat hī sahī

us ko bhī har vaqt rahtā hai talaffuz kā ḳhayāl
ishq maiñ ne bhī kiyā hai us se urdu kī tarah

hādisa ishq meñ darpesh huā chāhtā hai
dil shahanshāh se darvesh huā chāhtā hai

ishq ko zid hai ki ta.amīr kare shahr-e-umīd
husn kam-baḳht bad-andesh huā chāhtā hai

ishq pahlū meñ hai phir jalva-e-jānāna liye
zulf ik haath meñ ik haath meñ paimāna liye

be-ḳhatar kuud paḌā ātish-e-namrūd meñ ishq
aql hai mahv-e-tamāshā-e-lab-e-bām abhī