Tags-Ishq

'nadīm' apnī chāhatoñ pe naaz thā tumheñ bahut
to phir tumhāre ishq par zavāl kaise aa gayā

husn hai tū terā bhī charchā rahegā dā.imī
ishq huuñ maiñ aur afsāna amar merā bhī hai

shāyad ki huī sarāyat-e-ishq
kuchh siine meñ chīr-phāḌ sī hai

kaheñ to qissa-e-ahvāl muḳhtasar ye hai
ham apne ishq kī rūdād ho ke rah ga.e haiñ

dā.imī hai ishq aur ik dā.imī āvāz hai
mere kānoñ meñ abhī tak bas vahī āvāz hai

aap to ishq meñ dānā.ī liye baiThe haiñ
aur divāne haiñ ki rusvā.ī liye baiThe haiñ ham

sīna-e-ishq tamannāoñ kā madfan to nahīñ
shauq-e-dīdār agar hai taqāzā bhī karo

ishq bhī kyā chiiz hai sahal bhī dushvār hai
un ko idhar dekhnā mujh ko udhar dekhnā

jab tujhe yaad kareñ kār-e-jahāñ kheñchtā hai
aur phir ishq vahī koh-e-girāñ kheñchtā hai

intihā ishq kī koī na havas kī koī
dekhnā ye hai ki had kaun kahāñ kheñchtā hai

yūñhī ho jaatā hai qismat se koī ġham bedār
ishq ke haath meñ tadbīr kahāñ se aa.ī

ye ishq par husn kī ināyat ye husn se ishq kī irādat
hamārī hasrat hai aur tū hai tirī javānī hai aur ham haiñ

aur rañgīñ ho ga.ī us ke tabassum kī dhanak
ishq kā sūraj hayā kī barf pighlātā rahā

justujū kī koī manzil jo nahīñ hai to na ho
himmat-e-ishq ye kahtī hai ki baḌhtā hī rahūñ

badlā hai magar bhes ġham-e-ishq kā tū ne
bas ai ġham-e-daurāñ tujhe pahchān ga.e ham

koī majnūñ kī izzat ishq kī sarkār meñ dekhe
baḌī ḳhidmat pe aisā aadmī māmūr hotā hai

chārāgar nāseh-e-mushfiq dil-e-be-sabr-o-qarār
jo milā ishq meñ ġham-ḳhvār vo nādāñ niklā

shikva manzūr nahīñ tazkira-e-ishq na chheḌ
ki vo dar-parda mirā hāl-e-pareshāñ niklā

ishq kiyā to apnī hī nādānī thī
varna duniyā jaan kī dushman kab hotī hai

ishq-o-mazdūri-e-ishrat-gah-e-ḳhusruv kyā ḳhuub
ham ko taslīm niko-nāmi-e-farhād nahīñ