Tags-Ishq

rote hue jiine se ajal ishq meñ achchhī
murde meñ ye ḳhūbī hai ki ġhammāz nahīñ hai

ishq baḌhtā rahā sū-e-dār-o-rasan zaḳhm khātā huā muskurātā huā
rāsta rokte rokte thak ga.e zindagī ke badalte hue zāviye

ishq ko kab yaad thī rasm-e-vafā
husn kā kis muñh se shikvā kījiye

ḳhudā-e-ishq hai vo husn-e-kāfir
magar ab tak na samjhā ishq kyā hai

kaam apnā kar chukī bīmārī-e-ishq-e-butāñ
maiñ fareb-e-nusḳha-o-tāsīr-e-darmāñ meñ rahā

vahshat-e-ishq ne masrūf rakhā tujh meñ sadā
aur tujh ko kabhī mujh par hī bharosa na huā

ishq meñ hukm-udūlī bhī hameñ aatī hai
Talne vaale to nahīñ haiñ tire inkār se ham

dayār-e-ishq meñ aate kabhū rutoñ ke liye
bhaTakte phirte ho kyoñ tum mahūratoñ ke liye

pahle-pahal jo rabt thā jannat sā apne beach
phir ye khulā vo ishq na thā kār-zār thā

bahār-e-husn vo aa.e nazar jo us kī 'nazīr'
to dil vahīñ chaman-e-ishq meñ nihāl huā

ḳhirad ko gumshuda-e-kū-ba-kū samajhte haiñ
ham ahl-e-ishq tujhe rū-ba-rū samajhte haiñ

butān-e-shahr ko ye e'tirāf ho ki na ho
zabān-e-ishq kī sab guftugū samajhte haiñ

be-rāh jā rahā hai tujhe kuchh ḳhabar nahīñ
kis pher meñ paḌā hai batā harzā-gām-e-ishq

qadam rakkhā hai jab se ishq-nagrī
hameñ rone kī aadat ho ga.ī hai

husn ke chehre pe hai nūr-e-sadāqat kī damak
ishq ke sar par kulāh-e-faḳhr-e-insānī hai aaj

rahte haiñ intishār meñ saa.e idhar udhar
imkān-e-ishq sab hī gañvā.e idhar udhar

vo ishq-e-nā-murād mirī jaan le gayā
phāhe to zaḳhm-e-jāñ pe sajā.e idhar udhar

ishq kā kyūñki butāñ se kare iḳhfā koī
Dhab se nazroñ meñ ye kāfir vahīñ pā jaate haiñ

aql pe ham ko naaz bahut thā lekin ye kab sochā thā
ishq ke hāthoñ ye bhī hogā log hameñ samjhā.eñge

vo ik hameñ the jo sharminda-e-karam na hue
vo nañg-e-ishq the jo iltijā-pasand rahe