Tags-Ishq

na vo ishq meñ rahīñ garmiyāñ na vo husn meñ rahīñ shoḳhiyāñ
na vo ġhaznavī meñ taḌap rahī na vo ḳham hai zulf-e-ayāz maiñ

kamāl-e-ishq hai dīvāna ho gayā huuñ maiñ
ye kis ke haath se dāman chhuḌā rahā huuñ maiñ

maraz-e-ishq kī hālat koī ham se pūchhe
vo to achchhe haiñ jo bīmār nazar aate haiñ

Dagmagāte haiñ qadam rāh-e-vafā meñ mere
marhale ishq ke dushvār nazar aate haiñ

dil pahuñchā achānak hī tayaqqun kī fazā tak
sab vahm-o-gumāñ ishq kī asnād se nikle

yaañ ātish-e-ishq se shab o roz
dahke hai paḌā ayāġh dil kā

tirī chaah meñ dekhā ham ne ba-hāl-e-ḳharāb ise
par ishq o vafā ke yaad rahe ādāb ise

ḳhush ho ke abhī taisha-e-farhād uThā le
ai ishq ye qudrat kī atā mere liye hai

shu.ūr-e-ishq agar fitrat-e-nigāh meñ hai
hañsī meñ us kī vahī hai jo merī aah meñ hai

shābāsh 'dāġh' tujh ko kyā teġh-e-ishq khaa.ī
jī karte haiñ vahī jo mardāne aadmī haiñ

dayār-e-ishq meñ tum kyuuñ khaḌe ho ahl-e-havas
yahāñ to dār-o-rasan ke sivā kuchh aur nahīñ

yuuñ rasm-e-husn-o-ishq ko rusvā kareñge ham
tum muntazir rahoge na aaya kareñge ham

mai-kade meñ ishq ke kuchh sarsarī jaanā nahīñ
kāsa-e-sar ko yahāñ gardish hai paimāne kī tarah

aaj mohabbat rusvā hai hāthoñ se hoshyāroñ ke
ishq kī pahlī duniyā meñ thā koī dīvāna bhī

hama-tan sarf-e-hoshyāri-e-ishq
kuchh ajab shai hai be-ḳhudī dil kī

ishq kī ibtidā aur intihā ham se pūchho
phuul ko chuum ke kāñToñ pe zabāñ rakhte haiñ

mutma.in hai ishq bhī shām-e-alam ke bāvajūd
husn ke chehre pe bhī aks-e-pareshānī nahīñ

ishq meñ bhī tū na pā.egā kahīñ merā javāb
jān-e-man jo husn meñ koī tirā saanī nahīñ

ai 'zafar' paale hue haiñ vo bhī duniyā kī havas
ab faqīr-e-ishq meñ bhī bū-e-irfānī nahīñ

ishq karnā hai to pahle ishq ke ādāb siikh
raat kaise kāTte haiñ ye diye kī lau se pūchh