Tags-Ishq

use laag ishq kī kahte haiñ use aag ishq kī kahte haiñ
na junūn hai ye junūn meñ na koī ye raaz hai raaz meñ

ishq-e-atfāl-e-chaman meñ haiñ anādil betāb
āshiyānoñ kā ye aalam hai ki gahvāre haiñ

ḳhāna-e-ishq ke mehmāñ haiñ ham aur tadūr
daaġh haiñ ham ko nasīb aur use añgāre haiñ

atā kar mujhe vo maqām-e-mohabbat
kare husn ḳhud ishq kī pāsbānī

'salīm' dasht-e-tamannā meñ kaun hai kis kā
yahāñ to ishq bhī tanhā hai husn bhī tanhā

mizāj-e-ishq ho mānūs-e-zindagī itnā
ki misl-e-ḳhalvat-e-mahbūb ho bharī duniyā

go mubtalā-e-gardish-e-shām-o-sahar huuñ maiñ
phir bhī dayār-e-ishq meñ chīz-e-digar huuñ maiñ

go maiñ rah-e-hayāt meñ be-dast-o-pā huā
phir bhī muhīt-e-ishq meñ mahv-e-safar huuñ maiñ

merā muqābla nahīñ parvāz-e-fikr meñ
hālāñki josh-e-ishq meñ be-bāl-o-par huuñ maiñ

is aql kī maarī nagrī meñ kabhī paanī aag nahīñ bantā
yahāñ ishq bhī log nahīñ karte yahāñ koī kamāl nahīñ hotā

sab pe raushan hai ki rāh-e-ishq meñ mānind-e-sham.a
paañv par se ham ne qurbāñ rafta rafta sar kiyā

ishq to apnī jagah kaif-e-musalsal hai 'urūj'
nashsha-e-bāda nahīñ hai jo utar jā.egā

na.e jo ham-safar-e-kesh-e-ishq haiñ un ko
ma.āl-e-soz-e-mohabbat banā diyā ham ne

zamīn-e-shor lagī dasht-e-ārzū meñ jahāñ
vahīñ pe ishq kā paudā lagā diyā ham ne

mujh ko bhejā gayā hai ye kah kar
tum mire ishq kī amānat ho

bas hameñ ishq kī āshufta-sarī khīñchtī hai
rizq ke vāste ham ne kabhī hijrat nahīñ kī

dil bhī terā sā chāhiye hai 'nizām'
ishq ke iḳhtiyār karne ko

ishq ne phir kisī ko bhejā hai
ḳhair-maqdam kare chanāb us kā

maiñ huuñ ki mujh se saarā zamāna ḳhilāf hai
hālāñki jurm-e-ishq se koī barī nahīñ

jo tire ishq meñ tabāh huā
koī us ko tabāh kar na sakā