Tags-Ishq

nik.hat-o-nūr-o-ziyā husn kī pahchān bane
ishq mansūb huā bām-e-ḳharābāt ke saath

kitne ālām-o-masā.ib se guzartā huuñ maiñ
ishq ke kyā kyā haiñ dastūr tumheñ kyā ma.alūm

jo bhī ho ab ma.āl-e-ġham jo bhī ho ab nasīb-e-ishq
maiñ ne diye sabā diye ālam-e-shab ke ba.ad bhī

mirī chaah meñ mire ishq meñ tū kabhī kisī se laḌā nahīñ
isī bhuul kā ye azaab hai tū mirā nahīñ maiñ tirā nahīñ

tire ishq se mujhe kyā milā mirī zindagī huī maut sī
mujhe ab talāsh sukūñ kī hai mujhe ab junūn-e-hinā nahīñ

mujhe aisī zaat se ishq hai jo ho mehrbān to maut kab
hai fanā.iyat meñ nihāñ baqā hai baqā agar to fanā nahīñ

kis ke aa.e kis se rañg-raliyāñ kiyā pyaar aur chaah
ishq kī badnāmī pyāre rakh ke mujh uupar chale

havas hai jism kī āñkhoñ se pyaar ġhā.eb hai
badal ga.e haiñ sabhī ishq ke ma.ānī kyā

ḳhumār-e-ishq bhī utregā roz-e-vasl ke baad
rahegī apnī bhalā umr bhar javānī kyā

le ga.ī ishq kī hidāyat 'zauq'
un kane sab nihāyatoñ se mujhe

ḳhatā-e-ishq par kyuuñ 'nūh' apnī jaan kho baiThe
raqam itnī baḌī aur is ko jurmāne meñ rakh denā

jin se zinda ho yaqīn o āgahī kī aabrū
ishq kī rāhoñ meñ kuchh aise gumāñ karte chalo

donoñ ko de ke sūrateñ saath hī aa.ina diyā
ishq bisorne lagā husn ne muskurā diyā

daaġh hai mujh pe ishq kā merā gunāh bhī to dekh
us kī nigāh bhī to dekh jis ne ye gul khilā diyā

ishq kī mamlikat meñ hai shorish-e-aql-e-nā-murād
ubhrā kahīñ jo ye fasād dil ne vahīñ dabā diyā

tujhe husn māya-e-nāz hai dil-e-ḳhasta mahv-e-niyāz hai
kahūñ kyā ye qissa-e-rāz hai mirā ishq ḳhāna-ḳharāb hai

ye risāla ishq kā hai adaq tire ġhaur karne kā hai sabaq
kabhī dekh is ko varaq varaq mirā siina ġham kī kitāb hai

kyuuñ kar ho harīs-e-sitam-e-ishq kī serī
ġham rizq-e-muqaddar hai sivā ho nahīñ saktā

na ab vo ishq na vo ishq kī adā.eñ rahīñ
na ab vo husn na vo husn kī havā.eñ rahīñ

na ishq ishq rahā ab na husn husn rahā
na vo vafā.eñ rahīñ ab na vo jafā.eñ rahīñ