Tags-Ishq

soch meñ gum be-karāñ pahnā.iyāñ
ishq hai aur hijr kī tanhā.iyāñ

ab husn meñ paidā haiñ pazīrā.ī ke āsār
tum ishq meñ kuchh jur.at-e-iz.hār to laao

saarī duniyā ko Thukrāyā jā saktā hai
husn-o-ishq duā se paayā jā saktā hai

maiñ teġh-e-ishq se gar tol duuñ badan terā
tirī nazar meñ na mīzān-e-nek-o-bad aa.e

duur baiThā ġhubār-e-'mīr' us se
ishq bin ye adab nahīñ aatā

to azm-e-tark-e-ishq pe qaa.em to hai magar
tujh meñ ye chand roz se larzīda kaun hai

bahut mushkil zamānoñ meñ bhī ham ahl-e-mohabbat
vafā par ishq kī buniyād rakhnā chāhte haiñ

aql le aa.ī zindagī ko kahāñ
ishq-e-nādāñ tirī duhā.ī hai

shāyad ki dām-e-ishq meñ taaza huā hai band
va.ade pe gul-ruḳhāñ ke jise e'timād hai

jab kiyā ishq kā safar āġhāz
kab kināra thā merī āñkhoñ meñ

hayāt-e-ishq kā maqsūd ban ga.ī āḳhir
ye aarzū ki tirā naam le ke mar jaa.eñ

ye rāh-e-ishq hai āḳhir koī mazāq nahīñ
sa.ūbatoñ se jo ghabrā ga.e hoñ ghar jaa.eñ

kyā ābrū-e-ishq jahāñ aam ho jafā
ruktā huuñ tum ko be-sabab āzār dekh kar

ishq meñ har tamannā-e-qalb-e-hazīñ surḳh aañsū bahā.e to maiñ kyā karūñ
nā-umīdī hama-vaqt ummīd ke hāshiyoñ ko miTā.e to maiñ kyā karūñ

kaun sā ġham hai jis kā mudāvā nahīñ kaun sā dard hai jis kā chārā nahīñ
ishq ko ġham ho pyārā to kyā kījiye dard hī dil ko bhaa.e to maiñ kyā karūñ

dar ġharībī na thā kuchh aur mayassar 'hasrat'
ishq kī nazr kiyā diin o dil apnā ham ne

ishq kī be-tābiyāñ haiñ husn kī ra.anā.iyāñ
ho ga.e haiñ ziist ke sāmāñ baham mere liye

ishq kī mojiz-numā.ī 'kaif' ab kyā pūchhiye
bār-e-hastī ho gayā hai ḳhud hī kam mere liye

jo paḌe ishq kī aafat meñ vahī jaane 'hasan'
ḳhalq ke kahne meñ yuuñ āshiqī āsāñ to hai

nā-balad ho ke rah-e-ishq meñ pahuñchūñ to kahīñ
hamrā ḳhizar ko yaañ kahte haiñ gumrāh sunā