Tags-Ishq

'mīr' bhī kyā mast tāfeh thā sharāb-e-ishq kā
lab pe āshiq ke hamesha nāra-e-mastāna thā

kabhī ham ne piyā thā bāda-e-ishq
'jalīl' us ke maze ab aa rahe haiñ

ye ḳhabar hai ziist kā kārvāñ rah-e-ishq meñ hai ravāñ-davāñ
magar us kī koī ḳhabar nahīñ ki safar kahāñ pe tamām hai

tujh se uktā jaane kī ik saa.at bhī
tere ishq hī ke daurān meñ guzrī hai

samundar tishnagī kā ab sarāb-e-ishq meñ zam hai
shikasta haal merā shīsha-e-pindār hai phir bhī

ishq hī sho.ala-e-imkān-e-sahar hai varna
ḳhvāb ta.abīr se pahle hī pareshāñ hote

kuchh ho rahegā ishq-o-havas meñ bhī imtiyāz
aayā hai ab mizāj tirā imtihān par

ishq hotā hai kyā patā hotā
gar parindoñ se vāsta hotā

bevafā.ī kā surḳh rañg bhī hai
ishq meñ varna kyā maza hotā

hisse meñ aatā sirf amīroñ ke
ishq paisoñ meñ gar bikā hotā

ishq hotā hai tab hī jab 'mohsin'
muntaqil ho tabī.atoñ kā mazā

vo soz-o-sāz-e-ġham-e-ishq ab kahāñ lekin
nikaltī hai mire naġhmoñ se ġham kī lai ab bhī

tandurustoñ meñ na bīmāroñ ke biich
ishq ke huuñ maiñ dil-afgāroñ ke biich

ishq hai sair-e-ḳhudā ai dostāñ
is liye ashraf hai asrāroñ ke biich

manzil-e-dūr-o-darāz-e-ishq meñ
ġham ko paayā ham ne ġham-ḳhvāroñ ke biich

dostāñ hai lā-davā dūr-az-shifā
ishq kā āzār āzāroñ ke biich

rahm kar ham par bhī dil-bar haiñ tire
ishq ke hāthoñ se āvāroñ ke biich

soch kar na.ara lagāyā ishq ne
vo milā hai to gayā kuchh bhī nahīñ

ishq zinda yaar zindābād hai
is se aage kā patā kuchh bhī nahīñ