Tags-Ishq

un hasīñ ā.ankhoñ meñ aañsū aa ga.e
aah mere ishq kī rusvā.iyāñ

ishq kī fitrat hai 'ārif' bebasī
chal nahīñ saktīñ tirī ḳhud-ārā.iyāñ

husn kī dāstāñ banā Daalā
ishq kā tarjumāñ banā Daalā

ishq apnā usī ke naam rahā
husn ko sāhab-e-nishān kiyā

daaġh ke haikal anjhuvāñ kī maalā zīnat-e-ishq kī yahī nishānī
phireñ mast jo birah ke tan kuuñ motī laal pironā kyā

aaj 'ābrū' dil kuuñ hamāre shauq ne us ke magan kiyā hai
jaag anāḌī dekh tamāshā ishq lagā tab sonā kyā

itnā āsāñ nahīñ ye ishq dobāra banñā
aap kahte haiñ to sarkār banā dete haiñ

be-sahārā thakan hai aur maiñ huuñ
manzil-e-ishq tak chalī hī nahīñ

ujrat-e-ishq vafā hai to ham aise mazdūr
kuchh bhī kar leñge ye mehnat nahīñ hogī ham se

aurāq-e-dil-o-jāñ meñ haiñ kuchh daaġh hī baaqī
vo ishq-o-aqīdat kā hasīñ baab kahāñ hai

ham ko majnūñ ko ishq meñ mat buujh
nañg us ḳhāndāñ ke ham bhī haiñ

nachā rahā hai mujhe uñgliyoñ pe ishq tirā
tamām umr isī raqs-e-be-misāl meñ rakh

kuchh ishq ke nisāb meñ kamzor ham bhī haiñ
kuchh parcha-e-savāl bhī āsān chāhiye

hijr-o-visāl-e-yār kā mausam nikal gayā
ai dard-e-ishq jaag zamāna badal gayā

mastāna hamesha raho ai āshiq-e-'afrīdī'
be-ishq agar koī mardāna huā to kyā

ham ishq tere haath se kyā kyā na dekhīñ hālateñ
dekh āb-dīda ḳhuuñ na ho ḳhūn-e-jigar paanī na kar

ishq kā rog to virse meñ milā thā mujh ko
dil dhaḌaktā huā siine meñ milā thā mujh ko

kyā bad-balā hai ishq-e-kuhan-sāl kā maraz
hotā hai naujavān ko ye bārhā maraz

kyā jāneñ kaun rog hai ishq-e-balā-e-jāñ
saaya hai koī yā ki jhapaTTā hai yā maraz

iisā ke paas bhī koī is kī davā nahīñ
kahte haiñ jis ko ishq vo hai maut kā maraz