Tags-Ishq

jāda-e-ishq-o-vafā meñ chāhiye
rahravoñ par shauq-e-manzil kā nafāz

ham ne paayā ham ne dekhā jā-ba-jā
ishq-e-sādiq husn-e-kāmil kā nafāz

jazb-e-kāmil ishq meñ hai ḳhaas chiiz
ho na kyūñkar jazb-e-kāmil kā nafāz

usī husn-e-azal kī lauh-e-ālam par haiñ tahrīreñ
vahī ik ishq kā mazmūñ hai andāz-e-suḳhan kyā kyā

abhī se rah-navard-e-ishq himmat haar baiThe haiñ
guzarnī haiñ abhī to ghāTiyāñ un ko kaThan kyā kyā

ishq meñ huā un ke dushman ik jahāñ apnā
dard-e-dil kareñ kis se jā kar ab bayāñ apnā

dard jo aql ke isrāf se bach rahtā hai
ishq ke qaht-zadoñ kā hai vahī sarmāyā

husn se jab bhī chhiḌā mārka-e-dīda-o-dil
ḳhud mirā ishq mire madd-e-muqābil aayā

ishq ne roz-e-azal hī kar diyā thā faisla
phir kahāñ duniyā ke kahne se sudhar jā.eñge ham

maza to jab hai ki ai sabr-o-zabt-e-ishq ik din
vo ḳhud salām kare jo mirā salām na le

un logoñ kī baat karo jo ishq meñ ḳhush-anjām hue
najd meñ qais yahāñ par 'inshā' ḳhaar hue nākām hue

intihā par ishq aa kar ho gayā hai ain husn
maut kī bhī aañkh paḌtī hai tire bīmār par

āvāze mujh pe kaste haiñ phir bandagān-e-ishq
paḌ jaa.e phir na paañv meñ zanjīr dekhnā

vo alam gir ga.e jin ke saa.e tale
ishq kī avvalīñ satr likhī ga.ī

ishq ke ijz-o-niyāz husn ke andāz-o-nāz
koī ise kuchh kaho ham to samajhte haiñ ḳhvāb

maiñ ye chāhtā huuñ ki umr-bhar rahe tishnagī mire ishq meñ
koī justujū rahe darmiyāñ tire saath bhī tire ba.ad bhī

nā-guftanī hai ishq-e-butāñ kā muāmla
har haal meñ hai shukr-e-ḳhudā kuchh na pūchhiye

'ātish' gunāh-e-ishq kī ta.azīr kyā kahūñ
mushfiq jo kuchh hai us kī sazā kuchh na pūchhiye

ishq meñ kyā nuqsān naf.a hai ham ko kyā samjhāte ho
ham ne saarī umr hī yaaro dil kā kārobār kiyā

dil sulagtā hai sulagtā rahe jaltā hai jale
aisī bātoñ se bhalā ishq meñ bantā kyā hai