Tags-Ishq

ba-nām-e-ishq ġham-e-mo'tabar zarūrī hai
hayāt ke liye koī hunar zarūrī hai

bahut ġhalat hai tamannā-e-ḳhud-farāmoshī
vafūr-e-ishq meñ apnī ḳhabar zarūrī hai

vo jin ke qabze meñ ḳhudā.ī
ishq kī duniyā meñ haiñ bebas

ban ke ik misra-e-namnāk nazar tak pahuñchā
maujzan ishq mirā arsh-o-qamar tak pahuñchā

tum se kahte na bane ham ko pata hai vo shai
jazba-e-ishq thā hoñToñ se jigar tak pahuñchā

tamām ishq kī mohlat hai is āñkhoñ meñ
aur ek lamha-e-imkān bhī ziyāda nahīñ

zindagī ishq-o-mohabbat se javāñ hotī hai
varna be-kaif sī be-tāb-o-tavāñ hotī hai

intihā-e-ishq ho yuuñ ishq meñ kāmil bano
ḳhaak ho kar bhī nishān-e-sarhad-e-manzil bano

husn-e-ḳhud-bīñ mo.ajizāt-e-ishq kā qaa.il nahīñ
qatra-hā-e-ashk-e-ḳhūnīñ jam.a ho kar dil bano

qulzum-e-ishq kā ulTā hai tarīq
yaañ jo Duube so tire baiThe haiñ

manzil-e-ishq meñ ham ko koī aisā na milā
jis kī manzil ho tirī rāhguzar se aage

nahīñ hai jis meñ terā ishq vo dil hai tabāhī meñ
vo kashtī Duub jā.egī na jis meñ nāḳhudā hogā

chaal kī rahnumā-e-ishq ne bhī
vo dikhāyā jo thā maqām ḳharāb

hai ḳhuub 'suḳhan' ishq-e-nek-tīnat
ham ruuh ko sarshār dekhte haiñ

ishq kī ye masāfat bhī kyā ḳhuub hai
chāñd taare hue rahguzar ḳhvāb meñ

phirte haiñ ka.ī qais se hairān o pareshān
is ishq kī sarkār meñ bahbūd nahīñ hai

ho salāmat mirā ishq josh-e-junūñ husn ke raaz ḳhud munkashif ho ga.e
itnī mushkil nahīñ rahguzār-e-fanā be-ḳhudī chāhiye āgāhī ke liye

koī āzād ho to ho yaaro
ham to haiñ ishq ke asīroñ meñ

tū sukūn-o-sabr miTā.e jā ġham-e-ishq mujh ko rulā.e jā
ho taḌap taḌap ke sahar mujhe yahī dard-e-dil tirā kaam hai

ishq ko hausla-e-tark-e-vafā kaise ho
lafz ma.anī kī sadāqat se judā kaise ho