Tags-Ishq

junūñ havā taḌap huī ḳhalish huī ki ġham huā
ye daulateñ haiñ ishq kī ye ne.amateñ hai pyaar kī

maiñ koī ishq karūñ haar ke jiitā huā ishq
yaanī ushshāq meñ kuchh naam kamā.ūñ maiñ bhī

ishq kar detā hai jab aañkh pe jaadū to 'shamīm'
dair hotā hai nazar meñ na haram hotā hai

āñkhoñ ko phoḌ Dālūñ yā dil ko toḌ Dālūñ
yā ishq kī pakaḌ kar gardan maroḌ Dālūñ

vafā muqābil-o-dāvā-e-ishq be-buniyād
junūn-e-sāḳhta o fasl-e-gul qayāmat hai

ishq nashsha hai na jaadū jo utar bhī jaa.e
ye to ik sail-e-balā hai so guzar bhī jaa.e

luT chuke ishq meñ ik baar to phir ishq karo
kis ko mālūm ki taqdīr sañvar bhī jaa.e

jamāyā rañg apnā maiñ ne miT kar tere kūche meñ
yaqīn-e-ishq merā ab to tujh ko bad-gumāñ aayā

aql kā ta.an na kar mujh pe abhī ai nāseh
ik suḳhan ishq kā kah tujh ko bhī dīvāna karūñ

ye mausam kā taqāza aur bhīgī shab kī hasrat hai
badalnā ishq meñ hai āḳhirī pahlū zarā Thahro

tapish-e-dil na rahī sozish-e-jāñ baaqī hai
sho.ala-e-ishq kahāñ sirf dhuāñ baaqī hai

ye namāz-e-ishq hai kaisā adab kis kā adab
apne pā-e-nāz par karne bhī de sajda mujhe

ab mubtalā-e-ishq zyāda nahīñ huuñ maiñ
kahte ho tum yahī to phir achchhā nahīñ huuñ maiñ

maano mirī bhī baat ki sab kuchh luTā ke bhī
jiitā huuñ us ke ishq meñ haarā nahīñ huuñ maiñ

ye haqīqat hai ki donoñ fitratan ma.asūm haiñ
pāk-dāman husn bhī hai ishq bhī ḳhush-nām hai

ab to 'fā.iq' aur bhī mushkil se kuchh kaTne lagī
ishq bhī taskīn-e-ḳhātir ke liye nākām hai

kis māh-e-laqā ke ishq meñ yuuñ bechain haiñ ham betāb haiñ ham
kirnoñ kī tarah āvāra haiñ ham tāroñ kī tarah be-ḳhvāb haiñ ham

miT jaane pe bhī masrūr haiñ ham murjhāne pe bhī shādāb haiñ ham
shahbā-e-shabāb-o-ishq kā ik bhūlā huā rañgīñ ḳhvāb haiñ ham

rusvā.ī-e-sher-o-ishq ne vo rutba hameñ 'aḳhtar' baḳhshā hai
faḳhr-e-dakan-o-bañgāl haiñ ham nāz-e-avadh-o-panjāb haiñ ham

ishq agar hai diin to phir ho jā.eñge
ham bhī murtad is ke mukammal hone tak