Tags-Ishq

bevafā lauT ke aa dekh mirā jazba-e-ishq
āñsuoñ se tirī tasvīr banā laayā huuñ

zulfoñ se paḌā tuul meñ ab ishq kā jhagḌā
ḳhat aan ke ye majhla kotāh karegā

kyā muāfiq ho davā ishq ke bīmār ke saath
jī hī jaate nazar aa.e haiñ is āzār ke saath

na pūchho dil kī haqīqat tumhāre ishq meñ aah
use vo ġham jo lagā hai usī meñ galtā hai

ye jo ishq-e-masnad ke log haiñ unheñ ramz saare sikhā piyā
ye junūn-e-ishq kī dāstāñ unheñ harf harf sunā piyā

is se baḌh kar aur kyā hai sāda-lauhī ishq kī
aap ne va.ada kiyā aur ham ko bāvar ho gayā

hai ye shahr-e-ishq yaañ āb-o-havā kuchh aur hai
surḳh rañgat hai zamīñ kī aur fazā kuchh aur hai

dayār-e-ishq meñ vaa.iz ḳhirad kā kaam nahīñ
udhar na bhuul ke jaanā vo rāh-e-ām nahīñ

ye kaif-e-ishq hai vaqtī surūr-e-jām nahīñ
tirī tarah mirā nāseh ḳhayāl ḳhaam nahīñ

ab uḌātā hai mirī sahrā-navardī kā mazāq
ishq karne ke liye thā jis ne uksāyā mujhe

āshiq se nāk-bhauñ na chaḌhā o kitāb-rū
ham dars-e-ishq meñ ye alif bhī paḌhe nahīñ

baḌhā ek aur ġham ifshā-e-rāz-e-ishq se varna
na maiñ khultā na vo kahte ki aisā ho nahīñ saktā

duniyā kā rahā hai dil-e-nākām na diiñ kā
is ishq-e-bad-anjām ne rakkhā na kahīñ kā

ishq kī jannat daar ke pīchhe
jiit bhī hai is haar ke pīchhe

mirī dastaras meñ bhī kuchh nahīñ, nahīñ tere bas meñ bhī kuchh nahīñ
maiñ asīr-e-kākul-e-ishq huuñ mujhe kyā milegā najāt meñ

us pe marte ho to phir duniyā kī parvā kaisī
ishq hotā hai miyāñ had se guzarne ke liye

husn sar-tā-ba-qadam turfa-adā.ī chāhe
ishq tā-hadd-e-yaqīñ sāda-gumānī māñge

ḳhatm hone kā nahīñ mārka-e-ishq-o-havas
mas.ale saare mafādāt meñ uljhe hue haiñ

maiñ junūn-e-ishq meñ jaane kahāñ tak aa gayā
shahr ke har moḌ se patthar judāgāna chalā

ḳhatā-e-ishq kī itnī sazā hī kaafī thī
badal ke rah ga.e tevar zabāñ se kuchh na kahā