Tags-Ishq

kal to ba-hadd-e-shikva thiiñ ishq kī bad-gumāniyāñ
ab na nadāmateñ haiñ kyuuñ shikva-sarā ko kyā huā

hue aise ba-dil tire shefta ham dil-o-jāñ ko hamesha nisār kiyā
rah-e-ishq se phir na haTā.e qadam rahe mahv tire tujhe pyaar kiyā

na lo ishq kā naam ye kahte ho kyā jo ho teġh-tale bhī hamārā galā
yahī ham kahe jaa.eñ ḳhudā kī qasam tumheñ pyaar kiyā tumheñ pyaar kiyā

tire haath se maiñ jo shahīd huā mirī ruuh kā ishq murīd huā
jo hayāt rahā to na chhoḌe qadam jo marā to tavāf-e-mazār kiyā

tire roz-e-azal se farefta haiñ tire husn-o-jamāl ke shefta haiñ
tire ishq meñ ho ga.e kushta-e-ġham vahī kar ga.e qaul jo yaar kiyā

aaj nākām sahī kal kā bharosa hai mujhe
ishq phir kyā jo tujhe apnā banā bhī na sakūñ

'nāsir' hai rāh-e-shauq meñ 'momin' kā mo'taqid
umr-e-ravāñ dar ishq-e-butāñ kaaT dī ga.ī

qābil-e-ishq ye hasīn nahīñ
in daġhā-bāzoñ se vafā ma.alūm

jab kahā maiñ ne o taġhāful-kesh
haal hai mere ishq kā ma.alūm

bazm-e-duniyā meñ haiñ husn-o-ishq yuuñ jalva-numā
raushnī hai sham.a meñ to soz parvāne meñ hai

ātish-e-ishq dekh kar mālik
al-amāñ al-amāñ pukār uThā

kahā: ye kūcha-gardī aur kitnī der tak āḳhir
vo bole ishq meñ miTTī tumhārī ḳhvār to hogī

ishq o ulfat kī sazā mil ga.ī āḳhir mujh ko
mere aage mirī ma.asūm ḳhatā.eñ aa.iiñ

kitāb-e-ishq meñ saarā bayāñ visāl kā hai
maiñ zinda hijr meñ huuñ aur gumāñ visāl kā hai

masāfateñ dil-o-nigāh kī to pāniyoñ pe ḳhatm haiñ
ki ishq kī ye vahdateñ kisī bahāo meñ nahīñ

vo ishq hai
jo safed bāloñ pe hoñT rakhe

ātish-e-ishq meñ jo jal na mareñ
ishq ke fan meñ vo anārī haiñ

jī tan meñ nahīñ na jaan baaqī
hai ishq ko imtihān baaqī

hazār husn dil-ārā-e-do-jahāñ hotā
nasīb ishq na hotā to rā.egāñ hotā

ishq meñ aur dil-e-zār kī qadr
zabt ne baat baḌhā.ī hogī