Tags-Ishq

ishq ke sadme uThāne nahīñ āsāñ 'hasrat'
kar sake koī hamārā sā jigar dekheñ to

ḳhvāb thā merā ishq bhī ḳhvāb thā terā husn bhī
ḳhvāb meñ ya.anī ek aur ḳhvāb dikhā diyā gayā

ishq ke iz.hār meñ har-chand rusvā.ī to hai
par karūñ kyā ab tabī.at aap par aa.ī to hai

ishq kī aag meñ ab sham.a sā jal jā.ūñgā
tujh lagan biich qadam gaaḌ na Tal jā.ūñgā

husn kā nāz-e-tajallī hai niyāz-āmāda
ishq-e-ādāb-e-tamannā ke sazā-vār to ho

mujhe ab ishq miTTī se nahīñ hai
maiñ āshiq māl-o-zar kā ho gayā huuñ

ishq meñ phir sukūn kaise ho
dil jab aisā ho bad-gumāñ apnā

ahl-e-junūñ kā is liye mashrab judā rahā
vāqif niyāz-e-ishq se shaiḳh-e-haram nahīñ

bashar tanhā nahīñ dīvāne us shamshād-qāmat ke
shajar jakḌe hue haiñ ishq-e-pechī kī salāsil meñ

na duur dil se kabhī tū jaanā dil-o-jigar meñ maqām kar ke
piyāla-e-ishq ulaT na denā ai sāqiyā mai-ba-jām kar ke

tumheñ ranjish malāl-e-ishq hai gar
chalo phir sochnā kyā dekhte haiñ

atā-e-ishq hai ye dard hamdam
ḳhushī ko be-Thikāna dekhte haiñ

ik ishq kī baazī hī to ham haare haiñ us se
ai rāh-e-talab hausla hāreñge nahīñ ham

aalam meñ agar ishq kā bāzār na hotā
koī kisī bande kā ḳharīdār na hotā

pārīna ho chukī hai bahut dāstān-e-ishq
ik shahr-e-dasht najd meñ ta.amīr ho chukā

ik chāñd ro rahā thā sar-e-āsmān-e-ishq
tāroñ kī anjuman meñ koī chāragar na thā

kyā ḳhabar thī ai nigār-e-sher tere ishq meñ
dilbarān-e-shahr ke dildār ban jā.eñge ham

ishq ko husn ke atvār se kyā nisbat hai
vo hameñ bhuul ga.e ham to unheñ yaad kareñ

ġham ke hāthoñ shukr-e-ḳhudā hai ishq kā charchā aam nahīñ
galī galī patthar paḌte hoñ ham aise badnām nahīñ

aate haiñ mujhe ḳhuub se donoñ hunar-e-ishq
rone ke ta.iiñ āñdhī huuñ kuḌhne ko balā huuñ