Tags-Ishq

islām se bargashta na hote ba-ḳhudā ham
gar ishq-e-butāñ tab.a ke marġhūb na hotā

sar apnā rah-e-ishq meñ detā jo na 'jur.at'
tū majma-e-ushshāq kā sarkūb na hotā

pūchhte kyā ho ḳhabar ishq ke bīmāroñ kī
saikḌoñ rog haiñ kuchh had nahīñ āzāroñ kī

teġh-e-abrū ke tiir ishq meñ yaar
jaan se apnī haath dhotā huuñ

vo rah-e-ishq meñ junūñ apnā
dil jo tujh par nisār thā kyā thā

muhīt-e-ishq meñ hai kyā umiid o biim mujhe
ki Duub Duub ke kashtī mirī nikaltī hai

nahīñ hotī hai rāh-e-ishq meñ āsān manzil
safar meñ bhī to sadiyoñ kī masāfat chāhiye hai

huā hai ishq meñ kam husn-e-ittifāq aisā
ki dil ko yaar to dil yaar ko pasand huā

mere alfāz meñ merā ḳhūn-e-jigar kaise kaise jhalaktā hai dekheñ kabhī
sāz-e-ishq-o-havas go ham-āhañg haiñ phir bhī ishq-o-havas meñ taqābul kareñ

ab tak koī batā na sakā rāh-e-ishq meñ
manzil kahāñ se paas hai 'bismil' kahāñ se duur

ḳhud-kushī karne pe āmāda o majbūr haiñ ab
zindagī! ye haiñ tire ishq meñ marte hue log

naala bulbul kā jo suntā hai to khil uThtā hai gul
ishq ko muft kī begār na samjhā jaa.e

ishq ko shaad kare ġham kā muqaddar badle
husn ko itnā bhī muḳhtār na samjhā jaa.e

kabhī fursat se milo to tumheñ tafsīl ke saath
imtiyāz-e-havas-o-ishq bhī samjhā.eñge

hamārā ishq bhī had se guzarnā chāhtā hai
ki dil ho mahv-e-takallum nazar milī na milī

tujh ḳhat kī yaad meñ dil-e-hairān-e-ishq kā
durr-e-najaf kī tarah se mūdār thā so hai

jabīn-e-zīst pe marqūm hai mirī āvāz
ki tū ne zinda kiye husn-o-ishq ke e.ajāz

tirī nigāh ne aisī nazākateñ pā.īñ
ki husn ḳhud hī pukārā ki maiñ huuñ ishq kā raaz

baḌh ke chūme haiñ ġham-e-ishq ne bhī mere qadam
ġham-e-daurāñ ne bhī āñkhoñ pe biThāyā hai mujhe

chalne kā hausla nahīñ ruknā muhāl kar diyā
ishq ke is safar ne to mujh ko niDhāl kar diyā