Tags-Ishq

ishq ke andhe ḳhudā husn kā rasta dikhā
dar pe tire aa ga.e be-sar-o-sāmāñ tire

dekhne detā nahīñ us ko hijāb-e-ishq haa.e
huuñ maiñ vo mahrūm jis ko vasl aur hijrāñ hai ek

jazba-e-ishq bahut ḳhaak uḌātā hai magar
kū-e-jānāñ meñ ba-andāz-e-sukūñ dauḌtā hai

ishq ke ba.ad ab havādis kī zarūrat kyā rahī
āsmāñ dam le mire marne kā sāmāñ ho gayā

vus.at-e-sahn-e-jahāñ kuchh kam na thī ai ishq dost
kyuuñ ghaTā itnā ki dil vāloñ ko zindāñ ho gayā

ishq jab tujh se huā zehn ke jugnū jaage
lafz paikar meñ Dhale soch ke pahlū jaage

harīf-e-ishq koī ho harīf-e-ġham to nahīñ
kisī se ho na sakegā muqābla dil kā

husn se rābta-e-ishq ke mazmūñ haiñ bahut
is latāfat-kada-e-kaif meñ afsūñ haiñ bahut

mūjib-e-ishq thī magar 'fartāsh'
āgahī thī na pand thī ḳhushbū

ishq tumhārā khel hai baaz aayā is khel se meñ
mere saath hamesha be-īmānī hotī hai

hairat-e-ishq meñ tasvīr se rafta hī rahe
aise jaate haiñ jo ham bhī to bhale jaate haiñ

dekheñ pesh aave hai kyā ishq meñ ab to juuñ sail
ham bhī is raah meñ sar gaaḌe chale jaate haiñ

tū ne 'vahshat' kyuuñ ḳhilāf-e-rasm-e-ishq
dard ko rusvā-e-darmāñ kar diyā

apne aabā se bahut duur huā jaatā hai
aadmī ishq meñ majbūr huā jaatā hai

ye ishq kī hai fusūñ-tarāzī ki vahshatoñ kī karishma-sāzī
kamand ḳhushbū pe Dāltā huuñ havā ko zanjīr kar rahā huuñ

tohmat-e-ishq jab uThā lī hai
phir kyuuñ insāf kā savālī hai

mujh ko āvārgī-e-ishq kā ilzām na do
koī is shahr meñ be-ghar bhī to ho saktā hai

baḌhā do dard kī lau aur kam hai mere liye
abhī ye ishq meñ pahlā qadam hai mere liye

Thes lagtī hai jahāñ ishq kī ḳhuddārī ko
zindagī baḌh ke vahīñ sīna-sipar hotī hai

ab agar ishq ke āsār nahīñ badleñge
ham bhī pairāya-e-iz.hār nahīñ badleñge