Tags-Ishq

ishq gore husn kā āshiq ke dil ko de jalā
sāñvloñ ke āshiqoñ kā dil hai kaalā ko.elā

shāyad mujhe bhī ishq ne shādāb kar diyā
mere dil-o-dimāġh meñ har pal ḳhumār hai

vo kyā samajh sakegā mire ishq kā maqām
jo ruuh ke safar meñ badan kā sharīk thā

lutf jab hai ki rahe ishq sadā mahv-e-niyāz
aur is baat pe bhī naaz na hone paa.e

ishq aur husn mileñ mil ke ḳhudā ban jaa.eñ
gar havas tafraqa-andāz na hone paa.e

kuchh husn o ishq meñ farq nahīñ hai bhī to faqat rusvā.ī kā
tum ho ki gavārā kar na sake ham haiñ ki gavārā karte haiñ

tosha-e-rāh-e-ishq hai andoh
ġham diloñ ko qarīb laatā hai

vahī dil hai jo husn-o-ishq kā kāshāna ho jaa.e
vo sar hai jo kisī kī teġh kā nazrāna ho jaa.e

na sham.a-rū pe bhī duuñ jaan misl-e-parvāna
ki nām-e-ishq ko badnām kar nahīñ aatā

puḳhta hotī hai agar maslahat-andesh ho aql
ishq ho maslahat-andesh to hai ḳhaam abhī

be-ḳhatar kuud paḌā ātish-e-namrūd meñ ishq
aql hai mahv-e-tamāshā-e-lab-e-bām abhī

ishq farmūda-e-qāsid se subuk-gām-e-amal
aql samjhī hī nahīñ ma.anī-e-paiġhām abhī

sheva-e-ishq hai āzādī o dahr-āshobī
tū hai zunnārī-e-but-ḳhāna-e-ayyām abhī

ishq-bāzī hai jaan kī jokham
vahīñ maarā paḌā jahāñ chūkā

chashm-e-namnāk-o-dil par jigar sad-pāra
daulat-e-ishq se ham paas bhī thā kyā kyā kuchh

aur meñ Tek haTātā nahīñ darvāze se
ishq āvāz lagātā hai chalā jaatā hai

ḳhajil hūñgā matā-e-ishq par shāyad kisī din
abhī is faisle par naaz karnā chāhtā huuñ

huā majnūñ ke haq meñ dasht gulzār
kiyā hai ishq ke Tesū ne ban surḳh

fareb-e-da.avā-guzārī hai, mas.ala kuchh aur
sabhī ko ishq kā āzār thoḌī hotā hai

vo ishq jo ham se ruuTh gayā ab us kā haal batā.eñ kyā
koī mehr nahīñ koī qahr nahīñ phir sachchā sher sunā.eñ kyā