Tags-Ishq

ham ishq meñ un makkāroñ ke be-fā.eda jalte bhunte haiñ
matlab jo hamārā sun sun kar kahte haiñ ham ūñchā sunte haiñ

nazar aa ga.e vo aap hī dekhā jo aa.ina
samjhe the ishq hī ko marīz-e-nazar ġhalat

ye falak ye māh-o-anjum ye zamīn ye zamāna
tire husn kī hikāyat mire ishq kā fasāna

ye hai ishq kī karāmat ye kamāl-e-shā.irāna
abhī muñh se baat niklī abhī ho ga.ī fasāna

ishq kī ik zabān par laakh tarah kī bandisheñ
aap to jo kaheñ bajā aap kī baat aur hai

piine ko is jahān meñ kaun sī mai nahīñ magar
ishq jo bāñTtā hai vo āb-e-hayāt aur hai

ye sharāb-e-ishq ai 'sīmāb' hai piine kī chiiz
tund bhī hai bad-maza bhī hai magar iksīr hai

phir ham samajhte mil ga.ī ham ko vafā kī daad
rūdād-e-ishq sunte jo un kī zabāñ se ham

'sho.ala' samajh meñ ā.eñge kyā rāz-hā-e-ishq
jab tak ki āshnā na hoñ dard-e-nihāñ se ham

ai dost! mujh se ishq kī yaksāniyat na pūchh
tū bhī kabhī kabhī mujhe begāna chāhiye

ishq se dād-talab haiñ ki ham āvāra-manash
dar meñ dīvār na dīvār meñ dar DhūñDte haiñ

ishq tirī intihā ishq mirī intihā
tū bhī abhī nā-tamām maiñ bhī abhī nā-tamām

mere ḳhusrav ne mujhe ġham bhī ziyāda baḳhshā
daulat-e-ishq agar mujh ko sivā dī hai to kyā

yārab na rahe naam judā.ī ki rah-e-ishq
āsān thī par us ne hī dushvār bahut kī

kam ham sā ḳharīdār baham pahuñchegā us ko
kyuuñ ishq ne jins-e-ġham-e-bisyār bahut kī

ye ishq ajab lamha-e-tauqīr hai jānāñ
ḳhud merā ḳhudā us kī hī tafsīr hai jānāñ

sahī ifshā-e-rāz-e-ishq lekin ye musībat hai
na karte sajda tere dar par āḳhir to kahāñ karte

vasl kī chaah karūñ hijr meñ bhī aah bharūñ
ye mire ishq kā me.aar nahīñ ho saktā

vaise ye ishq kaun sā likkhā thā baḳht meñ
ham ne to apnī aap hī qismat ḳharāb kī

kaun maslūb huā husn kā kirdār ki ham
shohrat-e-ishq meñ badnām huā yaar ki ham