Tags-Ishq

thī mazār-e-ishq par minnat kī chādar kī tarah
zindagī terā yahāñ saudā huā achchhā huā

maiñ aur ye namkīn-e-ġham-e-ishq are tauba
tū aur ye ehsās-e-girāñ-bār-e-mohabbat!

kaun samjhe ishq kī dushvāriyāñ
ik junūñ aur laakh zimmedāriyāñ

ehtimām-e-zindagi-e-ishq dekh
roz mar jaane kī haiñ tayyāriyāñ

ishq kā ġham vo bhī tere ishq kā
kaun kar saktā mirī ġham-ḳhvāriyāñ

be-ḳhudi-e-ishq jaise ġham kī niind
ġham kī nīndeñ ruuh kī bedāriyāñ

ishq bhī hai kis qadar bar-ḳhud-ġhalat
un kī bazm-e-nāz aur ḳhuddāriyāñ

ye niyāz-e-ārzūmandī na dekh
aur kuchh haiñ ishq kī ḳhuddāriyāñ

iḳhtilāj-e-qalb ke daure nahīñ
ishq kī 'bismil' haiñ dil-āzāriyāñ

kūche se chale jā.iye 'aḳhtar' kahīñ ab aur
mazmūn bahut ishq kā chhānā nahīñ achchhā

ye zaḳhm-e-ishq hai koshish karo harā hī rahe
kasak to jā na sakegī agar ye bhar bhī gayā

'aḳhtar' junūn-e-ishq ke māroñ ko dekh kar
ahl-e-ḳhirad hañse haiñ to ronā paḌā mujhe

kitnā gahrā hai ishq kā dariyā
is kī tah meñ Dubo ga.iiñ āñkheñ

raas aa.e tum ko mulk-e-ishq kī āb-o-havā
āshiqo har-vaqt shaġhl-e-āh-o-zārī chāhiye

na to kaam rakhiye shikār se na to dil lagā.iye sair se
bas ab aage hazrat-e-ishq-jī chale jā.iye ghar hī ko ḳhair se

mujhe to intizār-e-ishq meñ hī lutf aatā hai
kisī kī chāhatoñ kā rañg har dhaḌkan pe taarī ho

ummīd-e-shauq ho yā vāda-e-rāhat-fizā koī
marīz-e-ishq ko achchhā nahīñ kartī davā koī

husn yuuñ ishq se nārāz hai ab
phuul ḳhushbū se ḳhafā ho jaise

tire ishq meñ hamesha milīñ pechdār rāheñ
kabhī ham bhaTak bhaTak kar rah-e-ām tak na pahuñche

ishq meñ us ke ki guzre haiñ sar o jaan se ham
apnī kis taur se hotī hai guzar dekheñ to