Tags-Ishq

ishq ne mansab likhe jis din mirī taqdīr meñ
daaġh kī naqadī milī sahrā milā jāgīr meñ

sau fasād ek ishq meñ uTThe
boyā ik tuḳhm uge hazār daraḳht

phal na laayā nihāl-e-ishq apnā
phale-phūle hazār baar daraḳht

ishq pareshāñ-hāl
nāz-e-husn malūl

na hoñ ḳhvāhisheñ na gilā koī na jafā koī
na savāl ahd-e-vafā kā ho vahī ishq hai

miT ga.ī tasvīr pahle ishq kī
sāmne ab dūsrī tasvīr hai

allāh barkatoñ se navāzegā ishq meñ
hai jitnī pūñjī paas lagā denī chāhiye

'bedam' namāz-e-ishq yahī hai ḳhudā-gavāh
har dam tasavvur-e-ruḳh-e-jānāna chāhiye

dāman-e-husn se kuchh aur sulag uThtī hai
ishq kī aañkh meñ shabnam bhī sharārā to nahīñ

dīvāna jo na ishq se ho aadmī nahīñ
husn-e-parī kā jalva tilism-e-jahāñ meñ hai

jo kuchh thā na kahne kā sab kah gayā dīvāna
samho to mukammal hai ab ishq kā afsāna

jab ishq ke māroñ kā pursāñ hī nahīñ koī
phir donoñ barābar haiñ bastī ho ki vīrāna

ye kyā ġhazab hai ki jis ne ahd-e-bahār chāhā na ishq dekhā
nizām-e-hijr-o-visāl saarā usī ke hāthoñ meñ aa gayā hai

ishq meñ dil se ham hue mahv tumhāre ai buto
ḳhālī haiñ chashm-o-dil karo in meñ guzar kisī tarah

yaar kā vasl-e-shabā-shab na huā thā so huā
sāġhar ishq-e-labā-lab na huā thā so huā

dastān-e-sham.a thī yā qissa-e-parvāna thā
anjuman meñ ishq hī unvān har afsāna thā

bīmār-e-ishq kahte haiñ dārushshifā use
aisī hī jo hasīn farañgī-mahal meñ hai

ba-faiz-e-ishq taqaddus-ma.āb haiñ ham log
hamārā zikr bhī kiije to bā-vazū kiije

ab marīz-e-ishq ko kaisā Thikāna chāhiye
ātish-e-dil ko havā par āshiyāna chāhiye

lag ga.iiñ haiñ daav par sāñseñ bisāt-e-ishq meñ
us taraf yā is taraf tai ho hī jaanā chāhiye