Tags-Ishq

ye dāġh-e-ishq jo miTtā bhī hai chamaktā bhī hai
ye zaḳhm hai ki nishāñ hai mujhe nahīñ mālūm

roz-do-roz kā qissa na samajhiye is ko
ishq to hotā hai ik umr rulāne ke liye

jab ye tai hai ki ġham-e-ishq bahut kaafī hai
ġham kā mafhūm hī samjhāo ki kuchh raat kaTe

ishq ke rañg liye phirtā huuñ
us kī tasvīr banā de koī

ishq ko ab le chaleñ aao ik aise moḌ par
pyaar meñ jo kuchh bhī ho vo bandagī hone lage

ishq betāb-e-jāñ-gudāzī hai
husn mushtāq-e-dil-navāzī hai

ashk ḳhūnīñ suuñ jo kiyā hai vazū
maz.hab-e-ishq meñ namāzī hai

jo huā rāz-e-ishq suuñ āgāh
vo zamāne kā faḳhr-e-rāzī hai

pāk-bāzāñ suuñ yuuñ huā mafhūm
ishq mazmūn-e-pāk-bāzī hai

aql ayyār hai sau bhes banā letī hai
ishq bechāra na mullā hai na zāhid na hakīm

koī to vahshī hai kahtā koī hai dīvāna
butoñ ke ishq meñ apnā kuchh ek naam nahīñ

kahīñ rusvā tirā shaidā sar-e-mahfil na ho jaa.e
pareshānī junūn-e-ishq kā hāsil na ho jaa.e

taqdīr se ye pūchh rahā huuñ ki ishq meñ
tadbīr koī bhī sitam-e-nā-gahāñ kī hai

ishq insāniyat se thā us ko
har ta.assub se māvarā thā firāq

jāda-e-ishq meñ ik aisā maqām aatā hai
shart-e-avval hai jahāñ tark-e-tamannā karnā

jazba-e-ishq kā iz.hār na hone paa.e
husn rusvā sar-e-bāzār na hone paa.e

aise bhī marāhil aate haiñ is manzil-e-ishq kī rāhoñ meñ
jab ashk bahāte haiñ ḳhud bhī us ko bhī rulā.e rakhte haiñ

hameñ hairat se mat dekho ab aisā kyā kiyā ham ne
zamīnī ishq hai sāhab dobāra ho bhī saktā hai

maiñ tumhāre ishq meñ rāt-din jo dikhā.ī detā huuñ mutma.in
mirā ghar hī sirf luTā ho dil to luTā na ho kahīñ yuuñ na ho

sar-e-rāh siina nikāltā huā aayā thā jo vo ḳhush-nigāh
dil-ishq-ḳhū ko vo par ġhurūr lagā na ho kahīñ yuuñ na ho