Tags-Ishq

jītnā ishq kī baazī koī āsān nahīñ
ain mumkin hai koī husn gavāh tak pahuñche

ishq-maslak meñ 'sadaf' ek hī dastūr hai bas
zaḳhm-e-dil had se baḌhe aur karāh tak pahuñche

'āsim' hī huā kāfir-e-ishq-e-shah-e-ḳhādim
is ramz ko har sāhab-e-asrār se kah do

maiñ apne ishq ko ḳhush-e-ehtimām kartā huā
maqām-e-shukr pe pahuñchā kalām kartā huā

yā ibtidā-e-ishq meñ ġham mere saath thā
yā ġham ke saath saath chalā jā rahā huuñ maiñ

ishq tanhā hai mire ālam-e-vahshat kā gavāh
tāq-o-mehrāb mire saath safar karte haiñ

ghar aur bayābāñ meñ koī farq nahīñ hai
lāzim hai magar ishq ke ādāb meñ rahnā

kuchh ḳhushī se hamīñ ishq-e-sitam-ījād nahīñ
apne kahne hī meñ apnā dil-e-nāshād nahīñ

siikh jaatā hai bashar ishq ke sadme sah kar
choT dil kī bhī kam az saili-e-ustād nahīñ

yuuñ huā huuñ maiñ 'nazar' ishq-e-butāñ meñ kāfir
maiñ to maiñ mere farishtoñ ko ḳhudā yaad nahīñ

jis rañg se hai dil meñ mire ishq ruḳh-e-yār
nāseh na ho dīvāna parī-ḳhāne ko mat chheḌ

vo sham-e-majālis to hai fānūs meñ raushan
ai ishq tū mujh soḳhta parvāne ko mat chheḌ

kabhī ishq karo aur phir dekho is aag meñ jalte rahne se
kabhī dil par aañch nahīñ aatī kabhī rañg ḳharāb nahīñ hotā

kārvān-e-husn-o-ishq ab tak kahīñ Thahrā nahīñ
qais abhī sahrā meñ hai lailā abhī mahmil meñ hai

ham-safar kuchh din rahe lekin ḳhudā jaane ki ab
ishq hai kis marhale meñ husn kis manzil meñ hai

jo tire ishq meñ tabāh huā
koī us ko tabāh kar na sakā

ishq ne yuuñ donoñ ko aamez kiyā
ab to tum bhī kah dete ho tum bhī naañ

ā.īn-e-ishq yuuñ bhī badalnā thā ek din
jo baat vasl se thī vo ab guftugū se hai

haikal-e-laḳht-e-dil meñ harf-e-vafā
murshid-e-ishq kī ināyat hai

ishq meñ 'fā.ez'-e-shaidā mumtāz
is kuuñ sab saath milāyā na karo