Tags-Ishq

āyateñ mansūb haiñ tujh se rumūz-e-ishq kī
aur inhī āyāt kī tafsīr ho jā.ūñgā maiñ

ai rāh-e-ishq ke raahī sun chal aise safar kī lazzat meñ
tirī āñkhoñ meñ na.e ḳhvāb to hoñ par ḳhvāboñ kī ta.abīr na ho

bichhaḌ ke tum se yaqīñ ho chalā hai ye mujh ko
ki ishq lutf-e-sazā be-misāl detā hai

jab us ne mujh se ye kahā thā ishq rifāqat hī to nahīñ
tab maiñ ne har shaḳhs kī sūrat mushkil se pahchānī thī

uljhan sī hone lagtī thī mujh ko akasr aur vo yuuñ
merā mizāj-e-ishq thā shahrī us kī vafā dahqānī thī

ishq kī hālat kuchh bhī nahīñ thī baat baḌhāne kā fan thā
lamhe lā-fānī Thahre the qatroñ kī tuġhyānī thī

jis ishq ko chhupāne meñ ik umr lag ga.ī
ik pal lagā hai us ko sar-e-ām hone tak

amiir imaam mubārak ho fat.h-e-ishq tumheñ
ye dard-e-māl-e-ġhanīmat hai sab tumhārā huā

ishq kī ḳhud-supurdagī dekhī
ḳhud tamāshā banā tamāshā.ī

ishq agar kījiye dil kījiye kis se ḳhālī
dard o ġham kam nahīñ is daur meñ ġham-ḳhvār kahāñ

ishq hai ishq ye mazāq nahīñ
chand lamhoñ meñ faisla na karo

had-e-idrāk se bāhar haiñ bāteñ ishq o mastī kī
samajh meñ is qadar aayā ki dil kī maut hai duurī

nahīñ vo husn jo āshiq ko shād-kām kare
nahīñ vo ishq jo nākāmiyoñ se kaam na le

ishq ke kūche meñ jab jaatā hai dil karne ko sair
vaañ nahīñ ma.alūm hotā roz hai yā raat hai

marnā azaab thā kabhī jiinā azaab thā
merā mushīr ishq sā ḳhāna-ḳharāb thā

hairāñ haiñ vo ki aise havasnāk daur meñ
tahzīb-e-ishq ab bhī nibhā.e hue haiñ ham

is tarah ishq meñ barbād nahīñ rah sakte
itne qisse to hameñ yaad nahīñ rah sakte

jāgīr-e-dard par hameñ sarkār-e-ishq ne
tahrīr kar diyā hai vasīqa davām kā

vādī-e-ishq meñ na milā koī ham-safar
sunte the naam ḳhizr alaihis-salām kā

khāne ko ai harīs ġham-e-ishq kam nahīñ
ye ho to kuchh bhī fikr na kar qarz-o-vām kā