Tags-Ishq

shart-e-shīrīñ kyā puurī ho tesha-o-jur.at kuchh bhī nahīñ
ishq o havas ke moḌ pe yuuñ to bhiiḌ hai ik farhādoñ kī

dekh saudā-zada-e-ulfat-e-ḳhūbāñ ai 'aish'
vādi-e-ishq meñ kyā kyā tag-o-pū karte haiñ

ye mere ishq kī daulat hai ūñchī qasr-e-sultāñ se
jo apnī saarī daulat ko yahīñ par chhoḌ jaatā hai

ham ishq meñ haiñ fard to tum husn meñ yaktā
ham sā bhī nahīñ ek jo tum sā nahīñ koī

yahī soz-e-ishq jis ko maiñ hamesha raaz samjhā
jo hijāb-e-dil na jaltā to na āshkār hotā

mai-e-ishq josh-zan hai ye lahū nahīñ ragoñ meñ
mirā nashsha kyuuñ utartā mujhe kyuuñ ḳhumār hotā

pahuñchā hai jo ki ishq meñ manzil ko vasl kī
be-shak sakal jahāñ meñ huā be-riyā riyā

jo kui qadam ko apne rakhā rāh-e-ishq meñ
kahte haiñ āshiqāñ kī vo manzil liyā liyā

sho.ala-e-ishq jigar tak to bhaḌak uTThā hai
kuchh ḳhabar bhī tujhe ai dīda-e-tar hai ki nahīñ

rah gayā ab junūñ hī kam-āmez
ishq meñ to haiñ baat baat ke dukh

kisī se mashvara-e-tark-e-ishq 'saif' na kar
na sun kisī kī dil āzmūda-kār ke ba.ad

ek kashtī kī hai talab 'rāhī'
ishq dariyā ke paar hai mujh ko

tirī mahfil se uTh kar ishq ke māroñ pe kyā guzrī
muḳhālif ik jahāñ thā jaane bechāroñ pe kyā guzrī

sho.ala-e-ishq bujhānā bhī nahīñ chāhtā hai
vo magar ḳhud ko jalānā bhī nahīñ chāhtā hai

labbaik pahle ham ne kahā thā rasūl-e-husn
ho kār-zār-e-ishq to parcham mile hameñ

ishq tā-hāl to matrūk nahīñ ho paayā
inqilābāt bhī go rāh-e-vafā meñ aa.e

shorish-e-ahd meñ ye tazkira-e-ishq-e-vafā
jaise naġhma sā koī bāñg-e-darā meñ aa.e

yahāñ ke rañg baḌe dil-pazīr hue haiñ
dayār-e-ishq ke hākim faqīr hote haiñ

bhiik rakh lo jo duā.eñ de gayā
vo faqīr-e-ishq thā saa.il na thā

kaise kaise javāñ kiye barbād
ishq kyā shai hai ye balā kyā hai