Tags-Ishq

ishq ke sadme uThā.e the bahut par kyā kareñ
ab to un sadmoñ se kuchh jī apnā ghabrāne lagā

maiñ hī kuchh be-sabr-o-tāqat ishq meñ us ke nahīñ
dil bhī ab be-tāqatī se kaam farmāne lagā

ishq kis zaat kā aqrab hai ki lagte hī niish
dil ke saath āñkhoñ se paanī ho bahā kyā kyā kuchh

ishq meñ ye faisla hai is dil-e-saudā.ī kā
ḳhud ko girte dekhnā us ko sambhalte dekhnā

kamāl-e-ishq dikhāne pe ab kamar bāñdho
na.ī zamīñ hai mazāmīn pur-asar bāñdho

tauhīd-e-ishq meñ mujhe donoñ haiñ ek se
marg-o-hayāt hech hai sūd-o-ziyāñ hai hech

nālāñ jo haiñ jahāñ meñ ġham-e-ishq se tire
nāqūs un ko hech hai bāñg-e-azāñ hai hech

ishq kī umr jab uchhāl kī thī
kyuuñ tamannā tujhe zavāl kī thī

kaun sā ishq-e-butāñ meñ hameñ sadma na huā
dard-e-furqat na huā ġham na huā kyā na huā

jazba-e-ishq se ham un ko bulā lete 'rasā'
ye bhī kambaḳht tabī.at ko gavārā na huā

ishq ke pech meñ huuñ chāhiye hamdam pas-e-marg
ishq-e-pechāñ hī mirī qabr ke lagvā.e qarīb

kuchh aql ke matvāle kuchh ishq ke dīvāne
parvāz kahāñ tak hai kis kī ye ḳhudā jaane

aalam dikhā rahe haiñ ajab nūr-o-nār kā
jalvoñ ko husn-o-ishq ke yak-jāñ kiye hue

tumheñ hai nashsha javānī kā ham meñ ġhaflat-e-ishq
na iḳhtiyār meñ tum ho na iḳhtiyār meñ ham

Thokareñ khā ke hī insān banā kartā hai
zindagī ishq meñ ho jā.egī yuuñ ḳhvār ġhalat

ishq kā josh sahī hausla ye ham meñ kahāñ
un se kuchh arz kareñge sar-e-bāzār ġhalat

pas-e-tark-e-ishq bhī umr-bhar taraf-e-mizha pe tarī rahī
mirī kisht-e-jāñ bhī ajiib hai ki ḳhizāñ ke saath harī rahī

ishq-e-qadd-e-yār meñ kyā nā-tavānī kā hai zor
ġhash mujhe aayā jo saaya paḌ gayā shamshād kā

ishq-e-pechāñ kā chaman meñ jaal phailā dekh kar
bulbuloñ ko sarv par dhokā huā sayyād kā

ye sāya-nashīnān-e-guzar-gāh-e-tamannā
kuchh ishq ke kuchh aql ke bahkā.e hue haiñ