Tags-Izhar

ġhair tak apnī baat pahuñchā.ī
us se iz.hār-e-mudda.ā kar ke

iz.hār-e-hāl-e-zār kā aisoñ se fā.eda
āzār dil kā tujh se dil-āzār kyā kaheñ

mohabbatoñ meñ sabhī kuchh nahīñ hai ḳhāmoshī
kabhī kabhār to iz.hār bhī zarūrī hai

ġham-e-pinhāñ se dam ghuTtā hai ai 'sīmāb' kyā kahiye
ḳhudā aisā kare ye qābil-e-iz.hār ho jaa.e

mujh se nafrat hai agar us ko to iz.hār kare
kab maiñ kahtā huuñ mujhe pyaar hī kartā jaa.e

be-gharī kā apnī ye iz.hār kam kar dījiye
sher meñ zikr-e-dar-o-dīvār kam kar dījiye

nazar meñ rakh mire iz.hār kī zarūrat ko
kabhī to nuun kā elaan bhī ravā kiyā kar

kaj-kulāhoñ se bhī sharminda na hone paa.e
ham meñ vo jur.at-e-iz.hār-e-bayāñ hai ki jo thī

iz.hār-e-mohabbat ke liye tum apne bose
kāġhaz meñ lapeT kar bhej saktī ho

iz.hār mohabbat ke liye lāzmī nahīñ
ki phuul ḳharīde jaa.eñ

majbūr-e-suḳhan kartā hai kyuuñ mujh ko zamāna
lahja mire jazbāt kā iz.hār na kar de

vo ab to is qadar iz.hār-e-haq se Dartā hai
agar likhā ho kahīñ lab to lab nahīñ paḌhtā

iz.hār-e-ġham kiyā thā ba-ummīd-e-iltifāt
kyā pūchhte ho kitnī nadāmat hai aaj tak

samjheñ ki na samjheñ vo ham ne to 'asad' rakh dī
ash.ār ke hoñToñ pe iz.hār kī gunjā.ish

iz.hār-e-vafā lāzim hī sahī ai 'arsh' magar fariyādeñ kyuuñ
vo baat jo sab par zāhir hai us baat kā charchā kyā ma.anī

yahī hai ab aarzū 'tabassum' ki dam nikal jaa.e aah karte
ki tāb-e-iz.hār-e-ulfat-e-yār sheva-e-āshnā nahīñ hai

hameñ ḳhabar thī ki us kā javāb kyā hogā
magar vo lutf jo iz.hār-e-mudda.ā meñ thā

ek din tujh ko dikhā.ūñgā maiñ in ḳhūbāñ ko
dāvā-e-yūsufī karte to haiñ iz.hār bahut

iz.hār-e-vafā hai to kis ummīd pe ai 'shauq'
tū dād-talab us se ki bedād-talab hai

pursish-e-hāl pe hai ḳhātir-e-jānāñ maa.il
jur.at-e-koshish-e-iz.hār kahāñ se lā.ūñ