Tags-Jannat

chāhe jannat na mile chāhe ḳhudā.ī na mile
hai duā merī yahī tujh se judā.ī na mile

riñd jannat meñ jā bhī chuke
vā.iz-e-mohtaram rah ga.e

kis tarah kahiye ki dīdār dikhāyā us ne
bāġh-e-jannat bhī nahīñ roz-e-qayāmat bhī nahīñ

us ke kūche meñ kahāñ kashmakash bīm-o-rajā
ḳhauf-e-dozaḳh bhī nahīñ ḳhvāhish-e-jannat bhī nahīñ

gulshan ho nigāhoñ meñ to jannat na samajhnā
dam-bhar kī ināyat ko mohabbat na samajhnā

dekh lenā ye jahāñ jannat-nishāñ ban jā.egā
dushmanoñ se rasm-o-rāh-e-zindagī paidā karo

chhalakte jaam haiñ hūreñ haiñ bāġh-e-jannat hai
uḌā rahe haiñ maze kyā tah-e-mazār nisār

samjhe haiñ sū-e-adab jannat-e-sānī kahnā
vo kuchh ashḳhās jo haiñ martaba-dān-e-dehlī

vo kahāñ jalva-e-jāñ-baḳhsh butān-e-dehlī
kyuuñ ki jannat pe kiyā jaane gumān-e-dehlī

tujh pe ye raaz munkashif zāhid-e-ḳhuld-jū kahāñ
hāsil-e-jannat-nazīr ālam-e-rañg-o-bū bhī hai

jannat kī ne.amatoñ kā mazā vā.izoñ ko ho
ham to haiñ mahv lazzat-e-bos-o-kanār meñ

ai sarv-chamāñ aave agar merī baġhal meñ
jannat kā chaman ḳhāna-e-āġhosh kare tū

maiñ un se pūchhūñgā jannat haiñ bechte kaise
mujhe navāz agar tere paas pāgal haiñ

sadiyoñ se mire paañv tale jannat-e-insāñ
maiñ jannat-e-insāñ kā pata pūchh rahī huuñ

kahāñ kī jannat kidhar kā dozaḳh kidhar kī duniyā kahāñ kā uqbā
ye sab fasāna ye sab kahānī 'sahar' faqat shaiḳh o shabāb kī hai

unheñ hī martaba miltā hai jā ke jannat meñ
husūl-e-ilm kī ḳhātir jo jaan vaare ga.e

jannat kī ham ko ḳhvāhish dozaḳh kā Dar nahīñ hai
be-asl muft vaa.iz ham ko ubhārte haiñ

mai-kada dekh ke jannat ko na bhuul
hirs se band-e-qanā.at mat toḌ

ghar jo ābād kiyā hai to ye sochā maiñ ne
tujh ko jannat meñ rakhūñ aap jahannam meñ rahūñ

adam meñ 'shād' ko kyā valvala ho jannat kā
ki ye ġharīb to hastī se dil ko maar aayā