Tags-Jannat

mil-jul kar īmān ḳhudā par lā sakte haiñ
ik jannat meñ bhuuk aur pyaas samā sakte haiñ

kaise rah saktī haiñ jannat kī fazā.eñ shaffāf
ḳhaak uḌāne ko hamīñ log vahāñ bhī hoñge

agar dhaḌkā ho jannat meñ to bad-tar hai jahannum se
hameñ gul ḳhaar sā lagtā hai us sayyād ke aage

jannat hai us baġhair jahannam se bhī zubūñ
dozaḳh bahisht haigī agar yaar saath hai

sheḳh ko jannat mubārak ham ko dozaḳh hai qubūl
fikr-e-uqbā vo kareñ ham ḳhidamt-e-duniyā kareñ

vo mai-kada thā sanam-kada thā ki bāb-e-jannat khule hue the
tamām shab aap ham kahāñ the huzūr ko kuchh to yaad hogā

ḳhudā se le liyā jannat kā va.ade
ye zāhid to baḌe hī ghaag nikle

chhūTī tirī galī to ye mujh ko yaqīñ huā
jannat hai vo jahāñ sitam-e-āsmāñ na ho

ham ne duniyā hī meñ jannat kā mazā luuT liyā
mehrbāñ ham pe jo vo huur huā ḳhuub huā

jannat ba-nigah tasnīm ba-lab andāz us ke ai shaiḳh na pūchh
maiñ jis se mohabbat kartā huuñ insāñ hai ḳhayālī huur nahīñ

maut aa.ī mujhe kūche meñ tire jaane se
niiñd aa hī ga.ī jannat kī havā khāne se

tirā milnā tirā nahīñ milnā
aur jannat hai kyā jahannam kyā

nashsha dar-e-gandum kā hiran hone se pahle
jannat se nikalnā hai ye sochā bhī nahīñ thā

ḳhuun se majbūr ke dasht-e-jahāñ jannat-badosh
shiddat-e-mehnat se dilkash rañg hai tasvīr kā

ummīd kī jhūTī jannat ke rah rah ke na dikhlā ḳhvāb hameñ
ā.inda kī farzī ishrat ke va.adoñ se na kar betāb hameñ

ḳhairāt kī jannat Thukrā de hai shaan yahī ḳhuddārī kī
jannat se nikālā thā jis ko tū us aadam kā potā hai

le chalā maiñ tirī jannat se bayābāñ kī taraf
sar chhupāne ko vahāñ tū mujhe ghar bhī denā

jis kī ḳhvāhish meñ kisī baat kī ḳhvāhish na rahe
aisī jannat ke dikhā.e na koī ḳhvāb mujhe

kūcha-e-yār ko da.avā hai ki jannat maiñ huuñ
ḳhuld kahte haiñ kise rauza-e-rizvāñ kaisā

manzil kī qadr hotī hai āvārgī ke ba.ad
jannat se is liye bhī nikālā gayā huuñ maiñ