Tags-Jannat

sajā leñ sab apnī apnī jannat ab aise ḳhāke banā ke uThnā

pī loge to ai shaiḳh zarā garm rahoge
ThanDā hī na kar deñ kahīñ jannat kī havā.eñ

koī kyā jaa.e jannat meñ ki us ne tuul khīñchā hai
qayāmat par bhī saaya paḌ gayā roz-e-judā.ī kā

is iftirā pe dījiye kuchh muftarī ko daad
jannat agar kahīñ hai to mere vatan meñ hai

pī shauq se vaa.iz are kyā baat hai Dar kī
dozaḳh tire qabze meñ hai jannat tire ghar kī

patā lagā ke gayā sū-e-gulshan-e-jannat
kahāñ kahāñ nahīñ kī maiñ ne justujū-e-sharāb

aisā bharā huā hai ġhazal meñ siñgār-ras
ik jannat-e-samā.a hai firdaus-e-gosh hai

maujūdgi-e-jannat-o-dozaḳh se hai ayaañ
rahmat hai ek bahr magar be-karāñ nahīñ

har muttaqī ko is se sabaq lenā chāhiye
jannat kī chaah ne jise shaddād kar diyā

hūreñ gale lipaTtī haiñ aa aa ke raat din
jannat kī raah kūcha-e-āġhosh ho gayā

jannat kī hūreñ aa.iiñ haiñ 'mā.il' dabāne mere paañv
baiThī haiñ nazdīk-e-kafan ek is taraf ek us taraf

ik ḳhuuñ aur gosht ke insāñ kā ma.abūd tirī jannat kī qasam
hūroñ se churānā aañkh āsāñ asnām se bachnā mushkil hai

rañgīñ bahār-e-jannat dozaḳh hai mujh ko us bin
dozaḳh hai us ke hote darussalām goyā

gar jahannum kī haqīqat jaan lo
raah jannat kī bahut āsān hai

jannat meñ pūchhte hue 'jāved' ham chale
dūkān kis taraf hai sharāb-e-tahūr kī

amal se zindagī bantī hai jannat bhī jahannam bhī
ye ḳhākī apnī fitrat meñ na nuurī hai na naarī hai

javāb-e-jannat-e-rañgīñ sahī tirī duniyā
magar hameñ to yahāñ lutf ai ḳhudā na milā

na 'chandā' ko tama.a jannat kī ne ḳhauf-e-jahannam hai
rahe hai do-jahāñ meñ haidar-e-karrār se matlab

jannat hai terī teġh ke kushtoñ kī muntazir
jauhar savād-e-jalva-e-mizhgān-e-hūr thā