Tags-Jannat

jannat meñ to nahīñ agar ye zaḳhm-e-teġh-e-ishq
badleñge tujh ko zindagī-e-jāvedāñ se ham

ai ḳhudā hindostāñ par ye nahūsat tā-kujā?
āḳhir is jannat pe dozaḳh kī hukūmat tā-kujā?

terī duā.eñ fat.h-o-nusrat
tere paañv ke nīche jannat

hūroñ se na hogī ye mudārāt kisī kī
yaad aa.egī jannat meñ mulāqāt kisī kī

sab ko sab kuchh milegā jannat meñ
bas vahāñ zindagī nahīñ hogī

ahl-e-jannat mujhe lete haiñ na dozaḳh vaale
kis jagah jā ke tumhārā ye gunahgār rahe

tujhe jis kā nasha har-dam liye phirtā hai jannat meñ
batā ai shaiḳh us kausar ko paanī kaun kahtā hai

khul rahā thā rū-ba-rū jannat ke gulshan kā chaman
nāznīn mahbūb goyā huur aur ġhilmān the

us huur kā makān hai jannat se bhī pare
rizvāñ pahuñch sake na kabhī pāsbāñ talak

tuubā kī salsabīl kī kausar ke jaam kī
hūr-o-qusūr-o-jannat-o-ġhilmān kī qasam

jannat ḳhayāl meñ hai na duniyā nigāh meñ
kyā lazzateñ milī haiñ ġham-e-be-panāh meñ

hasrat se chup huuñ maiñ tirī sūrat ke sāmne
jaise gunāhgār ho jannat ke sāmne

jannat ke muqāble meñ duniyā
aap apnī nazīr ho ga.ī hai

jis kī mahfil ko 'ravish' jannat-e-fardā kahiye
kal usī ḳhusrav-e-ḳhūbāñ se mulāqāt huī

mirā dil mere jis pahlū meñ raqsāñ thā usī pahlū meñ jannat thī
ye manzar chashm-e-vā ke ḳhvāb kī ta.abīr thā kal shab jahāñ maiñ thā

jannat mire ḳhayāl kī mismār ho ga.ī
bad-qismatī se zehn-e-rasā mil gayā mujhe

apnī jannat mujhe dikhlā na sakā tū vaa.iz
kūcha-e-yār meñ chal dekh le jannat merī

kashmīr se ayaañ hai jannat kā rañg ab tak
shaukat se bah rahā hai dariyā-e-gañg ab tak

har muttaqī ko is se sabaq lenā chāhiye
jannat kī chaah ne jise shaddād kar diyā

ġhilmān bhī jannat ke baḌī chiiz haiñ lekin
tauba mirī vo sāqī-e-gulfām hamārā