Tags-Jannat

maiñ ne kahā ki mujh ko hai jannat kī aarzū
us ne kahā ki vāqif-e-īmān haiñ bahut

nahīñ hai 'nāz' kam jannat se merā āshiyāna
mohabbat se muzayyan merā ghar kitnā hasīñ hai

tujh ko hī maqsūd thī apne liye kuchh bandagī
varna aadam ne tirī jannat ko Thukrāyā na thā

jabīñ jhukā.ī to jannat ḳharīd lī jaise
samajh rahe haiñ ki ab koī imtihāñ na rahā

tūba-e-jannat se us ko kaam kyā hai hūr-vash
jo ki haiñ āsūda saa.e meñ tirī dīvār ke

maiñ samajhtā huuñ ki hai jannat o dozaḳh kyā chiiz
ek hai vasl tirā ek hai furqat terī

uḌā mat ai nasīm-e-bāġh-e-jannat kyā karūñ tujh ko
mire sar par zarā pī kī galī kī ḳhaak rahne de

saudā.iyān-e-zulf meñ kuchh to laTak bhī ho
jannat meñ jā.iye to pareshān jā.iye

ai vatan hai duā tū salāmat rahe
apnī āñkhoñ meñ tū misl-e-jannat rahe

ye namāzoñ meñ ḳhayāl-e-jannat-e-hūr-o-qasūr
zāhid-e-kaj-bīñ abhī nau-mashq hai kāmil nahīñ

merī fitrat hī nahīñ 'qaisar' ki maiñ chhup kar piyūñ
jis meñ khaTkā ho vo jannat bhī mire qābil nahīñ

maanā ki tujh ko aish kī jannat nasīb hai
tahqīr-e-ġham na kar ki ye ne.amat ḳhudā kī hai

bāġh-e-jannat meñ samāñ kyā hogā
tū nahīñ jab to vahāñ kyā hogā

ye maanā hai jannat bahut ḳhūbsūrat
magar ḳhūbsūrat na hogī vatan se

jannat meñ piyegā kyūñkar ai shaiḳh yahāñ gar mashq na kī
ab maane na maane terī ḳhushī hai kaam mirā samjhāne kā

ham bhī apne ko badal Dāleñge rafta rafta
abhī duniyā hameñ jannat se baḌī lagtī hai

ye agle vaqtoñ ke haiñ ḳhush haiñ bāġh-e-jannat meñ
unheñ ḳhabar hī nahīñ kyā hai is savāb kī aañch

duniyā meñ to mamnūa hai jannat meñ hai jaa.ez
kyā baat hai vaa.iz kī yahāñ aur vahāñ aur

us duudh kā ḳhudā kare kaasa hameñ nasīb
jannat meñ panj-tan kī jo bahtī hai jū-e-shīr