Tags-Jannat

jannat se kuchh ġharaz hai na duniyā se vāsta
ma.ashūq apnā huur nahīñ hai parī nahīñ

ye chhīñTeñ ḳhuun kī kaafī haiñ mere baḳhshavāne ko
nazar aatī hai jannat vus.at-e-dāmān-e-qātil meñ

kisī ke paas rah kar bhī taḌapte hijr meñ 'nādir'
hameñ jannat meñ bhī kuchh aasrā hotā to kyā hotā

bashar āmāl kar achchhe tire aqbā meñ kaam aa.eñ
vahāñ jannat nahīñ miltī yahāñ se saath jaatī hai

duniyā jo na maiñ chand nafas ke liye letā
jannat kā ilāqa mirī jāgīr meñ aatā

na jannat ke qābil na dozaḳh ke laa.eq
mujhe kyuuñ kiyā ḳhalq ai mere ḳhāliq

jahannam ho ki jannat jo bhī hogā faisla hogā
ye kyā kam hai hamārā aur un kā sāmnā hogā

sar-e-mahshar ham aise āsiyoñ kā aur kyā hogā
dar-e-jannat na vā hogā dar-e-rahmat to vā hogā

shāyad tumheñ khoī huī jannat kahīñ mil jaa.e
dekho mirī in āñkhoñ meñ ḳhvāb utre haiñ kitne

ḳhatā kyūñkar na hotī āfiyat-soz
ki jannat hī na thī merāj-e-ādam

jab se ye khulā mujh pe ki maiñ huuñ nahīñ kuchh
tab se na jahannum hai na jannat mire aage

tirī galī meñ koī saa.e raat bhar ab bhī
surāġh-e-jannat gum-gashta DhūñDtā hogā

zaat ke gard fasīleñ haiñ riyāzat ma.alūm
sirf jannat ke liye hai to ibādat ma.alūm

shab ko mai ḳhuub sī pī sub.h ko tauba kar lī
riñd ke riñd rahe haath se jannat na ga.ī

vaah ye lutf-e-soz-e-ulfat kis kī badaulat dil kī badaulat
dozaḳh bhī hai mujh ko jannat kis kī badaulat dil kī badaulat

dāman-e-dil ai nasīm-e-gulshan-e-jannat na khīñch
lag gayā hai jī hamārā is ḳharāb-ābād meñ

dehāt se jo shahar meñ bakroñ ko laa.e haiñ
ma.alūm ho rahā hai vo jannat se aa.e haiñ

vo kaisī bazm jis meñ sab hoñ gūñge
vo jannat kyā jahāñ har shai nahīñ hai

vaa.iz tumhārī jannat-o-dozaḳh kī ḳhair ho
rindoñ kī kā.enāt baḌī duur tak ga.ī

ham tire ḳhvāboñ kī jannat se nikal kar aa ga.e
dekh terā qasr-e-ālī-shān ḳhālī kar diyā