Tags-Jannat

qadr maañ kī jo kar nahīñ saktā
jaane kyā hotī hai ye jannat kyā

dozaḳh ko yahī jannat kar de jannat ko yahī dozaḳh kar de
ham tujh ko batā.eñ kyā hamdam kyā chiiz mohabbat hotī hai

jannat-e-fikr bulātī hai chalo
dair-o-ka.aba se kalīsāoñ se duur

zindagī jaltī hai kitnī dozaḳhoñ kī aag meñ
chār-dīvāroñ kī ik jannat banāne ke liye

na jā.egā mere dil se ḳhayāl-e-abrū-e-dil-bar
ki teġhoñ hī ke saa.e meñ to hai jannat musalmāñ kī

dozaḳh meñ jal gayā kabhī jannat meñ ḳhush rahā
mar kar bhī saath gardish-e-ayyām le gayā

maiḳhāne meñ tū ai vaa.iz ab talqīn ke kuchh uslūb badal
allāh kā banda banñe ko jannat kā sahārā kyā ma.anī

aisī jannat kī havas tujh ko mubārak zāhid
jo tire husn-e-ḳhayālāt se aage na baḌhī

vo jalva-gāh-e-nāz ho yā bazm-e-ġhair ho
jannat hameñ vahīñ hai jahāñ dil bahal gayā

pyaar kā donoñ pe āḳhir jurm sābit ho gayā
ye farishte aaj jannat se nikāle jā.eñge

hai bazm butoñ se shaiḳh mahrūm
jannat meñ himār kyūñke jaave

kitne valiyoñ ne mire haath kī roTī khaa.ī
kitne shāhoñ ne mire paañv meñ jannat paa.ī

un kī jannat meñ rahe ham to ye ehsās huā
apne vīrānoñ meñ ham ḳhāk-basar achchhe the

sho.ale ugalte nāliyoñ ke dā.ere, faulād ke
jannat se dhutkārī huī aulād ke

jis meñ lākhoñ baras kī hūreñ hoñ
aisī jannat ko kyā kare koī

yahī sach-much banā degī tire ghar ko hasīñ jannat
zarā tum pyaar se karnā kabhī sarshār aurat ko

kaun-o-makāñ se duur zamīn-o-zaman se duur
manzil mirī hai jannat-o-ḳhuld-o-adan se duur

bahut se ḳhvāb haqīqat meñ dil-navāz na the
bahut se log chale aa rahe haiñ jannat se

guzar rahā huuñ kisī jannat-e-jamāl se maiñ
gunāh kartā huā nekiyāñ kamātā huā

nikāle the do chāñd us ne muqābil
vo shab sub.h-e-jannat kā jis par gumāñ thā