Tags-Jawani

ye javānī to buḌhāpe kī tarah guzregī
umr jab kaaT chukūñgā to shabāb aa.egā

javānī jā chukī 'mahrūm' zauq-e-ārzū kaisā
tumhāre be-niyāz-e-mudda.ā hone kā vaqt aayā

ye javānī to abhī mā.il-e-paikār nahīñ
ye javānī to hai rusvā-e-mai-o-jām abhī

kabhī us kī javānī manchalī thī
kabhī duniyā bhī sāñche meñ Dhalī thī

vo mahfileñ haiñ na ab vo sāthī rahe haiñ baaqī
na ab vo bachpan na vo javānī ravāñ hai paanī

jo ehsās-e-javānī kī hasīñ ḳhalvat meñ palte haiñ
vo jalve manzar-e-jazbāt par laane bhī hote haiñ

jis tamannā meñ guzartī hai javānī merī
maiñ ne ab tak nahīñ jaanā vo tamannā kyā hai

daulat-e-ahd-e-javānī ho ga.e
chand lamhe jo kahānī ho ga.e

is fan kī latāfat ko le jā.ūñ kahāñ āḳhir
patthar kā zamāna hai shīshe kī javānī hai

is shahr ke qātil ko dekhā to nahīñ lekin
maqtal se jhalaktā hai qātil kī javānī hai

ai husn tujhe itnā kyuuñ nāz-e-javānī hai
ye gul-badanī terī ik raat kī raanī hai

mubārak tujh ko ai sarv-e-ḳhirāmāñ
javānī dhuup jaise dopahar kī

kyā misl-e-charāġh-e-shab-e-āḳhir hai javānī
shiryānoñ meñ ik taaza tavānā.ī sī kyuuñ hai

tere ik baal kā sadqa bhī nahīñ thā jānāñ
tujh pe gar vaar maiñ apnī ye javānī detā

dasht-e-vahshat kī numā.ish kā havāla de kar
shahr-e-dildār ke tevar kī javānī dekhī

itrā ke ye raftār-e-javānī nahīñ achchhī
chaal aisī chalā karte haiñ jaisī ki havā ho

nā chanchal khel javānī ke nā pyaar kī alhaḌ ghāteñ thiiñ
bas raah meñ un kā milnā thā yā phone pe un kī bāteñ thiiñ

jāgte lamhoñ kī chādar oḌh kar
koī ḳhvāboñ ko javānī de gayā

vo ālam-e-madhoshī vo mastī-e-rindāna
gul-rañg javānī thī kyā hosh-rubā barsoñ

ḳhud apne aap se larzāñ rahī ulajhtī rahī
uThā na bār-e-garāñ raat kī javānī se