Tags-Jawani

parī thī koī chhalāvā thī yā javānī thī
kahāñ ye ho ga.ī champat jhalak dikhā ke mujhe

DhūñDho charāġh le ke za.īfoñ galī galī
ġham ho gayā shabāb javānī bichhaḌ ga.ī

ahd-e-javānī ro ro kaaTā 'mīr'-miyāñ sā haal huā
lekin un ke aage apnā qissa pīchhe chhūT gayā

le de ke tire dāman-e-umīd meñ 'māhir'
ek chiiz javānī thī javānī bhī luTā dī

'aḳhtar' ġhazab thī ahd-e-javānī kī dāstāñ
āñkhoñ ke aage ek parī-ḳhāna aa gayā

TuuTe jaise koī khilaunā miTTī kā
patthar jaisī saḳht javānī lagtī hai

tāshoñ kā thā khel suhānā bachpan kā
chū-mantar sī bharī javānī lagtī hai

tamām ālam-e-hastī pe hukmarānī hai
mirā jahān hai jab tak mirī javānī hai

haa.e kyā ahd-e-javānī-o-mohabbat hai ki ham
ik na ik marne kī tadbīr liye baiThe haiñ

haath meñ aaḌī teġh pakaḌnā taaki lage bhī zaḳhm to ochhā
qasd ki phir jī bhar ke satā.eñ uf rī javānī haa.e zamāne

apnī adā se aap jhijaknā apnī havā se aap khaTaknā
chaal meñ laġhzish muñh pe hayā.eñ uf rī javānī haa.e zamāne

hijr meñ apnā aur hai aalam abr-e-bahārāñ dīda-e-pur-nam
zid ki hameñ vo aap bulā.eñ uf rī javānī haa.e zamāne

'shād' na vo dīdār-parastī aur na vo be-nashsha kī mastī
tujh ko kahāñ se DhūñDh ke laa.eñ uf rī javānī haa.e zamāne

ek sitam aur laakh adā.eñ uf rī javānī haa.e zamāne
tirchhī nigāheñ tañg qabā.eñ uf rī javānī haa.e zamāne

pichhle pahar uTh uTh ke namāzeñ naak ragaḌnī sajdoñ pe sajde
jo nahīñ jaa.ez us kī duā.eñ uf rī javānī haa.e zamāne

kaalī ghaTā.eñ baaġh meñ jhūle dhānī dupaTTe laT jhaTkā.e
mujh pe ye qadġhan aap na aa.eñ uf rī javānī haa.e zamāne

yuuñ terī anjān javānī raah meñ aa.ī
jaise tū bachpan se mere saath na khelā

aatī hai nazar duur hī se husn kī ḳhūbī
kuchh aur hī hotī hai javānī kī nazar bhī

mujhe merī javānī ke taqāze
tamannāoñ se kyuuñ uljhā rahe haiñ

tumhāre qurb ke mausam kidhar ga.e 'tāriq'
kidhar ga.ī vo javānī talāsh karte rahe