Tags-Judai

kabhī bhūle se jo paiġhām un kā aayā bhī ik din
judā.ī kī taḌap meñ roz aisā hī asar kyuuñ ho

judā.ī ishq kī taqdīr hī sahī ġham-ḳhvār
magar na jaane vahāñ un kā haal kyā hogā

mohabbatoñ ke ḳharāboñ meñ dhuup kam niklī
kabhī judā.ī ke kohre kabhī malāl kī gard

rañg kaisā ye chaḌhā hai jo utartā hī nahīñ
tere lauT aane se bhī terī judā.ī na ga.ī

abhī to achchhī lagegī kuchh din judā.ī kī rut
abhī hamāre liye ye sab kuchh nayā nayā hai

kaT sake saḳhti-e-ayyām-e-judā.ī kyūñkar
ġhair ko aa.e ilāhī mirī aa.ī kyūñkar

tirī judā.ī meñ raat saarī sabā ye kahnā ba-āh-o-zārī
badalte guzrī hai mujh ko karvaT kabhī idhar ko kabhī udhar ko

maraz-e-judā.ī-e-yār ne ye bigāḌ dī hai hamārī ḳhū
ki muāfiq apne mizāj ke nazar aatī koī davā nahīñ

gar aaj tujh se judā haiñ to kal baham hoñge
ye raat bhar kī judā.ī to koī baat nahīñ

mere tūl-e-shab-e-judā.ī ko
terī zulf-e-darāz kyā jaane

ek din mil ke phir nahīñ milte
kis qayāmat kī ye judā.ī hai

kyuuñ baḌhāte ho iḳhtilāt bahut
ham ko tāqat nahīñ judā.ī kī

na tirā visāl visāl thā na tirī judā.ī judā.ī hai
vahī hālat-e-dil-e-bad-gumāñ tire saath bhī tire ba.ad bhī

ik shakl hameñ phir bhaa.ī hai ik sūrat dil meñ samā.ī hai
ham aaj bahut sarshār sahī par aglā moḌ judā.ī hai

thī pahle ajab judā.ī un kī
ab ḳhud se firāq hai ġhazab kā

tirī judā.ī ne ye kyā banā diyā hai mujhe
maiñ ek jism thā saaya banā diyā hai mujhe

ba.ad muddat ke vo milā hai mujhe
Dar judā.ī kā phir lagā hai mujhe

yā ham se ghaḌī-bhar kī judā.ī thī qayāmat
yā ham se ghaḌī-bhar bhī na ab baat karo ho

tū to hai 'anvar'-o-'maikash' kī judā.ī kā nishāñ
dil-e-pur-dard se ai daaġh na jaanā hargiz

ye jo baḌhtī huī judā.ī hai
shāyad āġhāz-e-be-vafā.ī hai