Tags-Judai

judā hue to judā.ī meñ ye kamāl bhī thā
ki us se rābta TuuTā bhī thā bahāl bhī thā

qalam meñ zor jitnā hai judā.ī kī badaulat hai
milan ke ba.ad likhne vaale likhnā chhoḌ dete haiñ

sabr kī mujh ko judā.ī meñ hai talqīn fuzūl
ye to jab ho ki rahe sham.a se parvāna judā

din judā.ī kā diyā vasl kī shab ke badle
lene the ai falak-e-pīr ye kab ke badle

ġham-e-judā.ī meñ aisī kahāñ thī lazzat-e-dard
unheñ bhī mujh se bichhaḌne kā dukh huā hogā

ek sabr-āzmā judā.ī hai
milne-julne kī band haiñ rāheñ

ab ke ye soch ke tum zaḳhm-e-judā.ī denā
dil bhī bujh jā.egā Dhaltī huī is raat ke saath

bikhartā huuñ judā.ī kī akelī vus.atoñ meñ
ye vīrānī mire ghar meñ Thikāna DhūñDhtī hai

is sitam-pesha ne qurbat kā na marham rakkhā
umr-bhar detā rahā zaḳhm-e-judā.ī mujh ko

rahnā tum chāhe jahāñ ḳhabroñ meñ aate rahnā
ham ko ehsās-e-judā.ī se bachāte rahnā

sabr o ārām kahūñ yā ki maiñ ab hosh-o-havās
ho gayā us kī judā.ī meñ judā kyā kyā kuchh

idhar se jitnī yagāngat kī udhar se utnī huī judā.ī
baḌhā.ī thoḌī sī jab idhar se bahut sī tum ne udhar ghaTā.ī

na apnā baaqī ye tan rahegā na tan meñ taab o tavāñ rahegī
agar judā.ī meñ jaañ rahegī tumhīñ batāo kahāñ rahegī

milā to de ke judā.ī chalā gayā āḳhir
hamāre hisse meñ tanhā safar rahā āḳhir

jaane kis moḌ judā.ī kī ghaḌī aatī hai
hijr kī bel muñDeroñ pe chaḌhī aatī hai

'sharaf' dam toḌte haiñ ik parī-rū kī judā.ī meñ
ajab aalam hai un kā dekh aa.e jis kā jī chāhe

judā.ī kī ghaḌī hai dushman-e-dil
balā hai ye nahīñ Taltī hai Tal ke