Tags-Judai

is qadar musalsal thiiñ shiddateñ judā.ī kī
aaj pahlī baar us se maiñ ne bevafā.ī kī

judā.ī meñ us zulf kī misl-e-shāna
mirī uñgliyāñ ustuḳhvāñ ho ga.ī haiñ

maiñ royā huuñ yaañ tak judā.ī meñ terī
ki āñkheñ mirī nāvdāñ ho ga.ī haiñ

na ho dard-e-judā.ī se jo vāqif us ko kyā kahiye
hameñ vo dekh kar kahte haiñ ġham aisā bhī hotā hai

vo but-e-be-raham ham se yuuñ judā.ī kar gayā
haa.e kis kāfir ko thī is bad zamāne kī ḳhabar

nahīñ ik ālam-e-shām-e-judā.ī
nazar meñ aur bhī aalam bahut haiñ

kahte haiñ jise urf meñ sab sub.h-e-bahārāñ
us shām-e-judā.ī kī sahar DhūñDh rahā huuñ

nazar aa.e jab āsār-e-judā.ī rañg-e-mahfil se
nigāh-e-'yās' begāna huī yārān-e-yak-dil se

hastī hai judā.ī se us kī jab vasl huā to kuchh bhī nahīñ
dariyā meñ na thā to qatra thā dariyā meñ milā to kuchh bhī nahīñ

āzmātī hai shab-e-hijr mujhe kyā hamdam
maiñ to ḳhush huuñ ki judā.ī kī haqīqat dekhī

ma.amūl judā.ī hai go phuul kī gulshan se
lekin jo huī anqā ḳhvāboñ meñ basī duniyā

yahī dard-e-judā.ī hai jo is shab
to aatā hai jigar mizhgān-e-tar tak

ye bhī hai zulm to ki use vasl meñ rahā
zikr-e-tulū-e-sub.h-e-judā.ī tamām shab

vasl meñ rañg uḌ gayā merā
kyā judā.ī ko muñh dikhā.ūñgā

ta.ajjub hai ki maiñ jāñ-soḳhta zinda rahā kyuuñ kar
judā.ī thī jahannum kā azaab avval se āḳhir tak

jigar kahīñ hai kahīñ dil kahīñ haiñ hosh o havās
faqat judā.ī meñ is ghar kā intizām nahīñ

rakho yā na rakho marham us pe ham samjhe
hamāre zaḳhm-e-judā.ī ko iltiyām nahīñ

kahā tum to judā.ī kā vo manzar bhuul baiThe ho
ḳhalā meñ dekh kar mujh se vo bolā yaad aatā hai

us ne likhā thā harf-e-judā.ī mire liye
phir miT ga.ī thī saarī ḳhudā.ī mire liye

intihā sabr-āzmā.ī kī
hai darāzī shab-e-judā.ī kī