Tags-Judai

kulfateñ judā.ī kī umr bhar nahīñ jātīñ
jī bahal to jaatā hai par kahāñ bahaltā hai

suhāg jis kī judā.ī meñ ujḌā ujḌā hai
kabhī to lauTegā sone kī chūḌiyāñ le kar

vo muddatoñ kī judā.ī ke baad ham se milā
to is tarah se ki ab ham gurez karne lage

bas ek ḳhauf thā zinda tirī judā.ī kā
mirā vo āḳhirī dushman bhī aaj maarā gayā

firāq-e-yār meñ mar mar ke āḳhir zindagānī ke
rahā sadma hamesha ruuh o qālib kī judā.ī kā

hubāb-āsā meñ dam bhartā huuñ terī āshnā.ī kā
nihāyat ġham hai is qatre ko dariyā kī judā.ī kā

nazar aatī haiñ har-sū sūrateñ hī sūrateñ mujh ko
koī ā.īna-ḳhāna kārḳhāna hai judā.ī kā

ye takalluf ye mudārāt samajh meñ aa.e
ho judā.ī to mulāqāt samajh meñ aa.e

sarishk-o-āh ab ye be-asar haiñ ki jā falak tak shab-e-judā.ī
dar-e-asar par ye de haiñ taale ba-āb-e-avval dovam-ba-ātish

anīs-e-dard-e-judā.ī tirā karam bhī nahīñ
tirā sitam bhī to rah-rah ke yaad aayā hai

shikva-e-dard-e-judā.ī pe vo farmāte haiñ
ranj sahne ko hamārā sā jigar paidā kar

vo añdherā thā ki hañgām-e-sahar bhī ham se
sham-e-andoh-e-judā.ī ko bujhāyā na gayā

pakḌā huuñ kināra-e-judā.ī
jaarī mire ashk kī nadī hai

āñkheñ haiñ ki ḳhālī nahīñ rahtī haiñ lahū se
aur zaḳhm-e-judā.ī hai ki bhar bhī nahīñ jaatā

tāb-e-dil sarf-e-judā.ī ho chukī
ya.anī tāqat āzmā.ī ho chukī

shab-ba-ḳhair us ne kahā thā ki sitāre larze
ham na bhūleñge judā.ī kā vo hañgām kabhī

haal merā sun ke paiġhāmī se vo kahne lage
gar na thī tāb-e-judā.ī kyuuñ liyā thā nām-e-ishq

vaa.e qismat dil lagāte hī judā.ī ho ga.ī
sub.h hote hī huī nāzil balā-e-shām-e-ishq

abhī to aas ke āñgan meñ kuchh ujālā hai
salone chāñd judā.ī ke bādaloñ meñ na Duub

agarche mujh ko judā.ī tirī gavārā nahīñ
sivā.e is ke magar aur koī chāra nahīñ