Tags-Judai

baal khole hue phirtī thiiñ hasīnā.eñ kuchh
vasl thā yā ki judā.ī kā samāñ thā kyā thā

kaash jīte-jī shajar saa.e meñ le letā mujhe
vasl ke mausam se pahle hī judā.ī ho ga.ī

kabhī to yuuñ thā ki imkāñ hī kyā judā.ī kā
aur ab lage ki ta.āruf bhī ġhā.ebāna huā

ilaaj kyā kareñ hukamā tap-e-judā.ī kā
sivā.e vasl ke is kā koī tabīb na ho

din vasl kā yuuñ kaTā kahe tū
kaaTī hai judā.ī kī magar raat

chhoḌ aayā thā mez par chaa.e
ye judā.ī kā isti.ārā thā

tum ko kyā ma.alūm mohabbat kyā hotī hai
tum ko kyā ma.alūm judā.ī kī shab kaise kaTtī hai

jis maraz meñ ki jaan jaatī hai
dilbaroñ hī kī vo judā.ī hai

chaar pahar kī hai ye raat
aur judā.ī ke sau saal

abhī to achchhī lagegī kuchh din judā.ī kī rut
abhī hamāre liye ye sab kuchh nayā nayā hai

har mulāqāt kā anjām judā.ī kyuuñ hai
ab to har vaqt yahī baat satātī hai hameñ

muzhda-e-jannat-e-visāl hai maut
zindagī mahshar-e-judā.ī hai

judā.ī itnī zarūrī hai jitnī tum chāho
hamāre vāste sabr-o-razā zarūrī hai

ham tum mile na the to judā.ī kā thā malāl
ab ye malāl hai ki tamannā nikal ga.ī

are-o jīte-jī dard-e-judā.ī dene vaale sun
tujhe ham sabr kar lete agar mar ke judā hotā

chalo ki donoñ hoñ gardāb-e-ittisāl meñ ġharq
na jaane vaqt kise sāhil-e-judā.ī de

ahl-e-vatan se duur judā.ī meñ yaar kī
sabr aa gayā 'firāq' karāmāt ho ga.ī

kahā lailā ne hai mujhe qais kā ġham mire dil ko hai us ke junūñ kā alam
nahīñ chain judā.ī meñ ab koī dam use vahshī-e-be-sar-o-pā kī qasam

lab-e-gor agarche judā.ī meñ huuñ magar ā.ina-e-dil kī safā.ī meñ huuñ
tirā mahv ḳhudā kī ḳhudā.ī meñ huuñ mujhe apne hī ishq-o-vafā kī qasam

ab ek umr judā.ī ke fāsle hoñge
bas ek vaqfa-e-shab hai mire gale lag jaao