Tags-Judai

kabhī to aa mere rashk-e-īsā huī hai muzmin tap-e-judā.ī
nahīñ shifā kī ummīd baaqī numūd chehre se murdanī hai

judā.ī ke zamāne kī sajan kyā zyādtī kahiye
ki us zālim kī jo ham par ghaḌī guzrī so jug biitā

zarā sī baat thī baat aa ga.ī judā.ī tak
hañsī ne chhoḌ diyā lā ke jag-hañsā.ī tak

zindagī naam hai judā.ī kā
aap aa.e to mujh ko yaad aayā

maiñ ne aise hī gunah terī judā.ī meñ kiye
jaise tūfāñ meñ koī chhoḌ de ghar shaam ke ba.ad

mirī bahār meñ aalam ḳhizāñ kā rahtā hai
huā jo vasl to khaTkā rahā judā.ī kā

judā.ī to muqaddar thī mujhe ehsās thā lekin
kaf-e-ummīd par phir bhī sharāra rakh liyā maiñ ne

vaqt hī judā.ī kā itnā tavīl ho gayā
dil meñ tire visāl ke jitne the zaḳhm bhar ga.e

kaT hī ga.ī judā.ī bhī kab ye huā ki mar ga.e
tere bhī din guzar ga.e mere bhī din guzar ga.e

shab-e-visāl bahut kam hai āsmāñ se kaho
ki joḌ de koī TukḌā shab-e-judā.ī kā

vaqt guzrā to judā.ī bhī judā.ī na rahī
ham yahāñ aur vo bhopal meñ ḳhush rahte haiñ

tirī judā.ī meñ jān-e-ālam kiyā hai donoñ ko ġham ne be-dam
banā.iye jā ke dil kī turbat ki dafn karne jigar ko chaliye

hamesha har saañs ne hamārī shab-e-judā.ī meñ aarzū kī
kisī tarah se tire chaman meñ nasīm ho kar sahar ko chaliye

ashkoñ se kahā maiñ ne judā.ī kā fasāna
is par ye kahā us ne ki aa.egī na.ī raat

ho jaa.e bakheḌā paak kahīñ paas apne bulā leñ behtar hai
ab dard-e-judā.ī se un kī ai aah bahut betāb haiñ ham

sub.h ho shaam judā.ī kī ye mumkin hī nahīñ
hijr kī raat vo hai jis ke liye din hī nahīñ

us se mil kar bhī udaas us kī judā.ī bhī garāñ
dil ba-har-hāl kisī taur bhī masrūr nahīñ

pūchhte kyā ho judā.ī meñ jo guzrī guzrī
tum ko ma.alūm hai sab haal kaheñ kyā apnā

ehsās judā.ī donoñ taraf āñkhoñ se merī aañsū haiñ ravāñ
us paar na jaane kaisā samāñ is paar ye pahlī bārish hai

tinkā tinkā kāñTe toḌe saarī raat kaTā.ī kī
kyuuñ itnī lambī hotī hai chāñdnī raat judā.ī kī