Tags-Justaju

dil ko thī ek shahr-e-tamannā kī justujū
lekin ham aarzū ke ḳharāboñ meñ kho ga.e

mujh ko us manzil se guzre kitnī muddat ho ga.ī
vaqt merī justujū meñ ab jahāñ hone ko hai

vo yahīñ haiñ jo vo kahīñ bhī nahīñ
aa.iye dil meñ justujū to kareñ

har ek saañs na jaane thī justujū kis kī
har ik dayār musāfir ko be-dayār milā

justujū kis ko na.ī duniyā kī thī
dasht meñ sho.aloñ ke bhaTkā maiñ ki tū

jo bhī guftugū kā usuul hai usī baat kā tū ḳhayāl rakh
na.ī kā.enāt kī justujū na.ī raushnī kī talāsh kar

umr guzrī talāsh meñ lekin
garmī-hā-e-justujū hai vahī

tavīl marhala-e-justujū bhī thā darpesh
so ittifāq nahīñ thā huā vo zāhir bas

na aarzū se khulā hai na justujū se khulā
ye husn-e-rāz jo har shai meñ kār-farmā hai

mujhe zindagī ke qarīb le ga.ī justujū
marī justujū bhalā kaun thā tujhe ilm hai

na de ham ko ilzām tū ye ki ham ne tirī chaah meñ kuchh kiyā hī nahīñ hai
makāñ khod Daale zamāñ noch Daale kahāñ aa ga.e ham tirī justujū meñ

umr-bhar kī justujū kā hai yahī hāsil 'ziyā'
ek dīvār-e-tahayyur aasrā detī huī

dil-e-tabāh kī īzā-parastiyāñ ma.alūm
jo dastaras meñ na ho us kī justujū karnā

ba-juz latāfat ehsās-e-justujū dil meñ
nigār-e-rafta kā koī surāġh hī na milā

ba-ma.a shu.ūr-o-irāda-o-justujū-o-ḳhirām
tire nisāb meñ 'naqqāsh' bāb-e-hazm bhī ho

junūñ-jaulān-e-dasht-e-justujū huuñ kyā ḳhabar is kī
milī manzil kahāñ mujh ko chhuTī manzil kahāñ mujh se

ishq kī manzil meñ lākhoñ kārvāñ gum ho ga.e
rahrav-e-rāh-e-mohabbat kyā kareñge justujū

dasht meñ gulshan meñ har jā kī hai terī justujū
ab kahāñ le jā rahā hai ai fareb-e-rañg-o-bū

tamām umr sahāroñ kī justujū meñ rahā
vo bad-nasīb jise terā aasrā na milā

faroġh-e-jalva-gāh-e-nāz apnī hī nazar tak hai
vahāñ tak jalve bhī hoñge jahāñ tak justujū hogī