Tags-Justaju

ye maanā dekhne ko vo zamāna ham nahīñ hoñge
hameñ DhūñDegī duniyā jab tumhārī justujū hogī

ham uTh jā.eñge mahfil se to un ko justujū hogī
hamārā zikr aa.egā hamārī guftugū hogī

jalā hai jism jahāñ dil bhī jal gayā hogā
kuredte ho jo ab raakh justujū kyā hai

na sanam-kadoñ kī hai justujū na ḳhudā ke ghar kī talāsh hai
mire dil meñ bhar de jo bijliyāñ mujhe us nazar kī talāsh hai

mirī raah ye tirī raah vo mirā saath tujh se nibhegā kyā
ki mujhe hai dard kī justujū tujhe chāragar kī talāsh hai

ye ashk aañkh meñ kis justujū ke saath aa.e
ki tere zikr tirī guftugū ke saath aa.e

manziloñ kī justujū meñ aa ga.e us moḌ par
ab jahāñ se lauTne kā rāsta koī nahīñ

talāsh kartī hai jis ko tumhārī rāhguzar
vo maiñ nahīñ thā mirī justujū kā saaya thā

mire shauq-e-dīd kī aarzū nahīñ chand phūloñ kī justujū
mire rañg-o-bū ke mazāq ko kisī gulistāñ kī talāsh hai

masā.ib ġhair kai pesh-e-nazar haiñ
ḳhud apnī justujū baaqī nahīñ hai

abhī kuchh aur tirī justujū rulā.egī
abhī kuchh aur bhaTaknā hai dar-ba-dar mujh ko

tirī justujū meñ nikle to ajab sarāb dekhe
kabhī shab ko din kahā hai kabhī din meñ ḳhvāb dekhe

fareb ġham hī sahī dil ne aarzū kar lī
burā hī kyā hai agar terī justujū kar lī

maiñ justujū meñ usī kūza-gar kī huuñ 'ishrat'
hai jis ke chaak kā fan-pāra māhtāb mirā

jaane kis kī justujū meñ is qadar ghūmā kiye
ham javāñ mardoñ kī har poshāk Dhīlī ho ga.ī

pesh-e-nigāh-e-muztarib hāsil-e-justujū bhī hai
ya.anī vo shoḳh mā.il-e-pursish-e-ārzū bhī hai

taḌap ki justujū kī raah meñ ye bhī ibādat hai
tirī har āh-e-sozāñ hai pyām-e-pur-asar terā

us ek zohra-jabīñ ke tufail jaarī hai
tamām zohra-jabīnoñ kī justujū mujh meñ

hai justujū ki ḳhuub se hai ḳhūb-tar kahāñ
ab Thahartī hai dekhiye jā kar nazar kahāñ

zindagī kī thī justujū ham ko
umr bhar justujū meñ kho.e rahe