Tags-Abroo

abrū kī tirī bait kī kiyā baat va-lekin
hai aah kā misra bhī dhuāñ-dār hamārā

hazāroñ teġh-bandoñ kuuñ kare qatl
ḳham-e-abru kī jab talvār bāñdhe

tere abrū kī ajab bait hai haalī ai shoḳh
jis meñ hai matlab-e-dīvān hilālī ai shoḳh

teġh-e-abrū hameñ bhī de ik zaḳhm
sar pe aalam ke daam hai terā

tāq-e-abrū haiñ pasan-e-tab.a ik dil-ḳhvāh ke
umr hotī hai basar gumbad meñ bismillāh ke

vasl kī shab barham hī rahā vo tā-ba-sahar uljhā hī kiyā vo
bal na gayā abrū se us kī zulf bhī ham ne suljhā dekhī

hai ishq meñ abrū ke jo kāhīda tan apnā
saaya tirī talvār kā hogā kafan apnā

tumhāre matla-e-abrū pe ye kahe hai ḳhaal
ki aisā nuqta koī vaqt-e-intiḳhāb to de

hilte haiñ abrū tire bār-e-gul-e-ruḳhsār se
jis tarah shāḳheñ lachaktī haiñ samar ke bojh se

ghaaT par talvār ke nahlā.īyo mayyat mirī
kushta-e-abrū huuñ maiñ kyā ġhusl-ḳhāna chāhiye

tere abrū kī yaad meñ ham ne
nāḳhun-e-ġham se dil-figārī kī

kal pesh-e-nazar thī teġh-e-abrū
ab siine kā ghaav dekhtā huuñ

zarīf abrū ġhazab ġhamza ġhussa ġhaur ġhazal
ghamanD qaus qazā ishq tanz niim saḳhī

tīr-o-nashtar kī baat hī kyā hai
hoñ jo abrū kamān kyā kahiye

kashīda un ke abrū haiñ nigāheñ tez hotī haiñ
kamāneñ khiñch rahī haiñ miyān se ḳhanjar nikalte haiñ

kabhī madfūñ hue the jis jagah par kushta-e-abrū
abhī tak is zamīñ se saikḌoñ ḳhanjar nikalte haiñ

abrū kī havā bhī na lagī bul-havasoñ ko
us teġh kī roz aañch meñ be-āb jale ham

abrū-e-pur-chīñ kuuñ tere dekh dil hairāñ huā
kyā magar shamshīr-e-jauhar-dār kuuñ dekhā na thā

aañkh apnī tirī abrū pe jamī rahtī hai
roz is bait pe ham saad kiyā karte haiñ

jo abrū ke hoñge ishāre yūñhī
mirī jaan lākhoñ kaTeñge gale