Tags-Abroo

ghaaT par talvār ke nahlā.īyo mayyat mirī
kushta-e-abrū huuñ maiñ kyā ġhusl-ḳhāna chāhiye

har lahza teġh jānñā abrū kā iftirāk
har lamha zauq-e-qatl meñ sar haath par daroġh

terī abrū ko jo hilāl kahā
māh-e-nau se bhī kuchh sivā samjhe

abrū kī tasavvur meñ huā qatl mirā dil
phal kyuuñ na mile mard thā talvār bahut kī

sharh likkhā chāhiye us kī bayāz-e-sub.h par
matla-e-ḳhurshīd bait-e-abrū-e-jānāna hai

teġh-e-abrū ke tiir ishq meñ yaar
jaan se apnī haath dhotā huuñ

charāġhte haiñ kisī nazm ke ghane abrū
kisī ġhazal kī judā.ī meñ mar ke dekhte haiñ

hastī o adam kyā haiñ ba-juz jumbish-e-abrū
ai jān-e-kināyāt ishārāt kiye jā

chashm-e-kāfir se tire hoñge musalmāñ kāfir
ḳham-e-abru se sanam gabr musalmāñ hogā

saut jafā-kesh hai āshiq jigar-resh hai
abrū hai yā niish hai bichchhū hai yā ḳhaal hai

nazar aatā nahīñ mānind-e-abrū ek māh-e-nau
mahīnoñ rahtī haiñ vo hasrateñ madd-e-muqābil meñ

hamārā kāba-e-maqsūd terā tāq-e-abrū hai
tirī chashm-e-siyah ko ham ne āhu-e-haram paayā

'nāsir' mirī ġhazal ko bahāroñ kā bāñkpan
detī hai us kī jumbish-e-abrū kabhī kabhī

mat dekh butoñ kī abrū ko haT yaañ se tū ai dil varna tujhe
ek aan meñ bismil kar deñge aur aap tamāshā dekheñge

abrū kī to thī chiin mire dil pe ġhazab par
mizhgāñ se numūdār hue ḳhanjar-e-kīñ aur

go teġh-e-asīl haiñ ye abrū
har dam itnā bhī ḳham na kiije

mizhgāñ se bach 'nasīm' ki abrū ke paas haiñ
ye tīr-e-be-ḳhatā haiñ kamān-e-kashīda ke

ab koī ġhazal-chehra dikhā.ī nahīñ detā
ab shahr meñ abrū kī kamāneñ nahīñ hotīñ

ta.ammul ke tum ko duur se jo bhuul ga.e apnā pisar
vo gosh-o-abrū khīñch kar mizhgān tīr-andāz the